កិច្ចចរចាអាមេរិក-អ៉ីរ៉ង់បរាជ័យ! លោក JD Vance បញ្ជាក់គ្មានកិច្ចព្រមព្រៀងក្រោយជំនួបជាង២១ម៉ោង

(អ៉ីស្លាម៉ាបាដ)៖ អនុប្រធានាធិបតីអាមេរិក លោក JD Vance នៅថ្ងៃទី១២ ខែមេសា ឆ្នាំ២០២៦ បានបញ្ជាក់ថា មិនមានកិច្ចព្រមព្រៀងណាមួយត្រូវបានសម្រេចឡើងជាមួយ អ៉ីរ៉ង់ ទេ បន្ទាប់ពីកិច្ចចរចាកម្រិតខ្ពស់ប្រទេសប៉ាគីស្ថាន ខណៈអ៉ីរ៉ង់បដិសេធលក្ខខណ្ឌស្នូលរបស់សហរដ្ឋអាមេរិក ស្តីពីការមិនអភិវឌ្ឍអាវុធនុយក្លេអ៊ែរ។

លោក JD Vance បានឱ្យដឹងថា កិច្ចចរចាទល់មុខគ្នាជាលើកដំបូងរវាងអាមេរិក និងអ៉ីរ៉ង់ចាប់តាំងពីឆ្នាំ១៩៧៩ មកនេះ បានប្រព្រឹត្តទៅអស់រយៈពេលជាង២១ម៉ោង ដោយលោកបានទំនាក់ទំនងជាបន្តបន្ទាប់ជាមួយប្រធានាធិបតី Donald Trump និងមន្ត្រីជាន់ខ្ពស់ផ្សេងទៀត។ លោកបានគូសបញ្ជាក់ថា សហរដ្ឋអាមេរិកទាមទារឱ្យអ៉ីរ៉ង់ប្តេជ្ញាចិត្តយ៉ាងច្បាស់ថា នឹងមិនអភិវឌ្ឍ ឬស្វែងរកសមត្ថភាពអាវុធនុយក្លេអ៊ែរឡើយ ដែលជាគោលដៅស្នូលនៃការចរចា។

ទោះជាយ៉ាងណា ប្រភពពីអ៉ីរ៉ង់បានបញ្ជាក់ថា កិច្ចចរចាអាចបន្តឡើងវិញ ខណៈភាគីអាមេរិកមិនបានបញ្ជាក់ពីការចាប់ផ្តើមឡើងវិញនោះទេ និងគ្រោងត្រឡប់ទៅប្រទេសវិញ។

ក្នុងអំឡុងពេលជំនួបនេះ លោក JD Vance រួមជាមួយបេសកជនពិសេស លោក Steve Witkoff និងលោក Jared Kushner បានជួបពិភាក្សាជាមួយប្រធានរដ្ឋសភាអ៉ីរ៉ង់ លោក Mohammad Baqer Qalibaf និងរដ្ឋមន្ត្រីការបរទេស Abbas Araqchi រយៈពេលជាង២ម៉ោង មុនពេលបញ្ចប់ជំនួបដោយគ្មានលទ្ធផលជាក់ស្តែង៕