ស្ត្រីម្នាក់បង្ហោះវីដេអូអះអាងត្រូវប្តីប្រើអំពើហិង្សា ស្នើសុំយុត្តិធម៌ពីអាជ្ញាធរ

(ភ្នំពេញ)៖ ករណីអំពើហិង្សាក្នុងគ្រួសារមួយ កំពុងក្លាយជាប្រធានបទក្តៅលើបណ្តាញសង្គម បន្ទាប់ពីស្ត្រីម្នាក់ដែលប្រើគណនីហ្វេសប៊ុកឈ្មោះ “Sarany Teng” បានបង្ហោះសារ និងវីដេអូ អះអាងថា ត្រូវបានប្តីរបស់ខ្លួនប្រើអំពើហិង្សាលើរូបនាងជាបន្តបន្ទាប់។ នេះបើតាមប្រភពដែលអង្គភាពសារព័ត៌មាន The Mirror News ទទួលបាននៅព្រឹកថ្ងៃទី៨ ខែមេសា ឆ្នាំ២០២៦នេះ។

តាមខ្លឹមសារដែលបានបង្ហោះ ស្ត្រីរូបនោះបានរៀបរាប់ពីស្ថានភាពដ៏លំបាករបស់ខ្លួន ដោយលើកឡើងថា ជីវិតរបស់នាងអាចបន្តបានដល់សព្វថ្ងៃ គឺដោយសារការគាំទ្រពីម្តាយ។ នាងក៏បានចោទប្រកាន់ប្តីឈ្មោះ គង់ វុទ្ធី ថាបានប្រើកម្លាំងរាងកាយលើនាង និងមានពាក្យគំរាមកំហែងធ្ងន់ធ្ងរ ដែលធ្វើឲ្យនាងមានការភ័យខ្លាចយ៉ាងខ្លាំងចំពោះសុវត្ថិភាពផ្ទាល់ខ្លួន។

ស្ត្រីដដែលបន្តថា ហេតុការណ៍ត្រូវបានអះអាងថាកើតឡើងទាំងនៅក្នុងបន្ទប់គេង និងនៅជាន់ក្រោមនៃលំនៅឋាន ខណៈនាងអះអាងថាត្រូវបានបោកបញ្ចូលមុខសមាជិកគ្រួសាររបស់ប្តី។ ទោះជាយ៉ាងណា ភាគីគ្រួសាររបស់បុរសរូបនោះ បានបដិសេធការចោទប្រកាន់នេះ ដោយអះអាងថា ស្ត្រីគ្រាន់តែដួលដោយខ្លួនឯង មិនមានសកម្មភាពប្រើហិង្សាដូចការអះអាងឡើយ។

ក្នុងសំណេររបស់ខ្លួន ស្ត្រីរូបនេះបានបង្ហាញការសង្ស័យចំពោះស្ថានការណ៍ដែលកើតឡើង និងបានលើកសំណួរថា តើនាងដួលដោយខ្លួនឯង ឬត្រូវបានប្រើកម្លាំងពីភាគីម្ខាង។ ព្រមទាំងបានបង្ហាញការព្រួយបារម្ភថា អាចមានការអន្តរាគមន៍ពីមនុស្សមានឥទ្ធិពល ដែលនាំឲ្យជនដែលនាងចោទប្រកាន់ មិនត្រូវបានអនុវត្តតាមនីតិវិធីច្បាប់។

ជាមួយគ្នានេះ នាងបានអំពាវនាវដល់ថ្នាក់ដឹកនាំកំពូល ក្រសួងកិច្ចការនារី ក្រសួងយុត្តិធម៌ និងក្រសួងមហាផ្ទៃ មេត្តាចូលរួមអន្តរាគមន៍ ដើម្បីផ្តល់យុត្តិធម៌ និងការពារសុវត្ថិភាពដល់រូបនាង និងក្រុមគ្រួសារ។

អង្គភាពព័ត៌មានយើង សូមបញ្ជាក់ថា ខ្លឹមសារខាងលើ គឺដកស្រង់ពីការបង្ហោះនៅលើបណ្តាញសង្គមតែប៉ុណ្ណោះ ហើយមិនទាន់មានការបញ្ជាក់ជាផ្លូវការពីសមត្ថកិច្ច ឬស្ថាប័នពាក់ព័ន្ធនៅឡើយទេ។

បច្ចុប្បន្ន អង្គភាពយើងកំពុងរង់ចាំការបកស្រាយពីគ្រប់ភាគីពាក់ព័ន្ធ ដើម្បីធានាការផ្សាយព័ត៌មានប្រកបដោយតុល្យភាព និងវិជ្ជាជីវៈ៕