មន្ទីរអភិវឌ្ឍន៍ជនបទខេត្តកណ្តាលបង្ហាញទឹកចិត្តមនុស្សធម៌ ចុះសួរសុខទុក្ខ និងឧបត្ថម្ភអតីតមន្រ្តីចូលនិវត្តន៍ដល់គេហដ្ឋាន

(កណ្ដាល)៖ ដោយទទួលបានការណែនាំ និងចាត់តាំងពីលោកស្រី ជី ថាវី ប្រធានមន្ទីរអភិវឌ្ឍន៍ជនបទខេត្តកណ្តាល នៅព្រឹកថ្ងៃទី៨ ខែមេសា ឆ្នាំ២០២៦ លោក ហឿន ទ្រី អនុប្រធានមន្ទីរ តំណាងលោកស្រីប្រធានមន្ទីរ បានដឹកនាំលោក លោកស្រី ប្រធាន និងអនុប្រធានការិយាល័យជំនាញ ចុះសួរសុខទុក្ខលោក អ៊ុក យ៉ុនរ៉េត អតីតមន្រ្តីនៃមន្ទីរអភិវឌ្ឍន៍ជនបទខេត្តកណ្តាល ដែលបច្ចុប្បន្នជានិវត្តន៍ជន និងកំពុងមានជំងឺប្រចាំកាយ សម្រាកព្យាបាលនៅគេហដ្ឋាន ស្ថិតក្នុងក្រុងតាខ្មៅ។

ក្នុងឱកាសនោះផងដែរ ក្រុមការងារមន្ទីរបាននាំយកថវិកាឧបត្ថម្ភរបស់លោកស្រីប្រធានមន្ទីរ ប្រគល់ជូនលោក អ៊ុក យ៉ុនរ៉េត ដើម្បីជួយសម្រួលក្នុងការព្យាបាល និងជីវភាពប្រចាំថ្ងៃ ព្រមទាំងបានផ្តាំផ្ញើសួរសុខទុក្ខ និងក្តីនឹករលឹកយ៉ាងជ្រាលជ្រៅពីសំណាក់លោកស្រី ជី ថាវី ជូនចំពោះលោក និងក្រុមគ្រួសារ។

សកម្មភាពនេះបានបង្ហាញឲ្យឃើញពីការយកចិត្តទុកដាក់ និងការគោរពចំពោះមន្រ្តីរាជការចាស់ជំនាន់ ដែលបានខិតខំបំពេញភារកិច្ចក្នុងការបម្រើជាតិ និងប្រជាពលរដ្ឋកន្លងមក ហើយក៏ជាការលើកទឹកចិត្តដ៏មានតម្លៃចំពោះមន្រ្តីដែលកំពុងបម្រើការងារបច្ចុប្បន្នផងដែរ។

ជាមួយគ្នានេះ លោក អ៊ុក យ៉ុនរ៉េត និងក្រុមគ្រួសារ បានសម្តែងនូវក្តីគោរពអរគុណយ៉ាងជ្រាលជ្រៅក្រៃលែងចំពោះលោកស្រី ជី ថាវី ប្រធានមន្ទីរអភិវឌ្ឍន៍ជនបទ ដែលតែងតែយកចិត្តទុកដាក់ សួរសុខទុក្ខ និងគិតគូរអំពីសុខទុក្ខរបស់មន្រ្តីរាជការ ក៏ដូចជាមន្រ្តីចូលនិវត្តន៍ និងក្រុមគ្រួសារជាបន្តបន្ទាប់។

ក្នុងឱកាសដ៏មានអត្ថន័យនេះផងដែរ លោក និងក្រុមគ្រួសារ ក៏បានគោរពជូនពរលោកស្រីប្រធានមន្ទីរ ព្រមទាំងក្រុមគ្រួសារជាទីស្រឡាញ់ និងមន្រ្តីទាំងអស់ សូមមានសុខភាពល្អបរិបូរណ៍ កម្លាំងមាំមួន ប្រាជ្ញាវៀងវៃ អាយុយឺនយូរ ប្រកបដោយសុភមង្គល និងសម្រេចជោគជ័យគ្រប់ភារកិច្ច ព្រមទាំងសមប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕