ឧបនាយករដ្ឋមន្ត្រី ស សុខា ជំរុញយុវជន ៧១៧នាក់ អភិវឌ្ឍជំនាញឌីជីថលភ្ជាប់នឹងក្រមសីលធម៌ ដើម្បីឆ្ពោះទៅសម័យបច្ចេកវិទ្យា

(ព្រៃវែង)៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានថ្លែងបញ្ជាក់ជូនសិក្ខាកាមចំនួន ៧១៧នាក់ បន្ទាប់ពីបញ្ចប់វគ្គបណ្ដុះបណ្ដាលជំនាញរដ្ឋបាលកុំព្យូទ័រ កាត់តវីដេអូ និងប្រើប្រាស់ទូរស័ព្ទដៃថា វគ្គបណ្ដុះបណ្ដាលនេះ គឺស្របតាមយុទ្ធសាស្រ្តបញ្ចកោណរបស់រាជរដ្ឋាភិបាល ដែលកំណត់យក “បច្ចេកវិទ្យា” ជាគន្លឹះសំខាន់ក្នុងការអភិវឌ្ឍធនធានមនុស្សសម័យថ្មី។

ថ្លែងក្នុងពិធីបិទវគ្គបណ្ដុះបណ្ដាល នៅខេត្តព្រៃវែង នាថ្ងៃទី៧ ខែមេសា ឆ្នាំ២០២៦ ឯកឧត្តមបានបន្តថា ជំនាញដែលសិក្ខាកាមទទួលបាន នឹងក្លាយជាមូលដ្ឋានគ្រឹះដ៏សំខាន់ សម្រាប់បង្កើនសមត្ថភាពផ្ទាល់ខ្លួន និងបន្តចាប់យកឱកាសថ្មីៗ ក្នុងបរិបទបច្ចេកវិទ្យាកំពុងរីកចម្រើនយ៉ាងឆាប់រហ័ស ជាពិសេសការប្រើប្រាស់បញ្ញាសិប្បនិម្មិត (AI) ដែលកំពុងក្លាយជាទិសដៅសកល។

ឯកឧត្តមឧបនាយករដ្ឋមន្ត្រី ក៏បានផ្ដល់អនុសាសន៍ដល់សិក្ខាកាមជំនាន់ថ្មី ឱ្យបន្តខិតខំរៀនសូត្រ ដោយប្រកាន់ខ្ជាប់វិន័យ និងភាពទៀងទាត់ ព្រមទាំងលើកកម្ពស់ការច្នៃប្រឌិតផ្ទាល់ខ្លួន ដោយមិនគួរចម្លងតែគំរូពីអ្នកដទៃនោះឡើយ។

ជាមួយគ្នានេះផងដែរ ប្រមុខក្រសួងមហាផ្ទៃ បានដាស់តឿនយ៉ាងច្បាស់ថា ការមានជំនាញបច្ចេកទេសតែប៉ុណ្ណោះ មិនគ្រប់គ្រាន់ទេ ប៉ុន្តែត្រូវភ្ជាប់ជាមួយនឹងក្រមសីលធម៌ និងវិជ្ជាជីវៈ។ ការផលិតមាតិកា ឬកាត់តវីដេអូ ដោយខ្វះការយកចិត្តទុកដាក់លើច្បាប់ និងតម្លៃសង្គម អាចបង្កផលប៉ះពាល់ដល់វប្បធម៌ និងអត្តសញ្ញាណជាតិបាន។

សារបញ្ជាក់របស់ឯកឧត្តម ស សុខា បង្ហាញឱ្យឃើញពីការយកចិត្តទុកដាក់របស់រាជរដ្ឋាភិបាល ក្នុងការបណ្ដុះបណ្ដាលធនធានមនុស្សឱ្យសមស្របនឹងសម័យឌីជីថល ខណៈដែលការរីកចម្រើននៃបច្ចេកវិទ្យា កំពុងក្លាយជាចលករដ៏សំខាន់សម្រាប់ការអភិវឌ្ឍសង្គម និងសេដ្ឋកិច្ចជាតិ៕