ប្រព័ន្ធ Hotline 1292 អាវុធហត្ថខេត្តកំពង់ស្ពឺ ឆ្លើយតបទាន់ពេលវេលា បង្ក្រាបជនបែកថ្នាំរំខានពិធីបុណ្យសព ដោយជោគជ័យ

(កំពង់ស្ពឺ)៖ ប្រព័ន្ធ Hotline 1292 របស់កងរាជអាវុធហត្ថខេត្តកំពង់ស្ពឺ កំពុងបន្តបង្ហាញតួនាទីសំខាន់ក្នុងការទទួលព័ត៌មាន និងអន្តរាគមន៍ដោះស្រាយបញ្ហាប្រជាពលរដ្ឋបានយ៉ាងរហ័ស និងមានប្រសិទ្ធភាពខ្ពស់ ក្រោមការដឹកនាំយ៉ាងម៉ឺងម៉ាត់របស់លោកឧត្ដមសេនីយ៍ត្រី ម៉េង ស្រ៊ុន មេបញ្ជាការ។

ជាក់ស្តែង នៅវេលាម៉ោង ១៥:១០នាទី ថ្ងៃទី០៦ ខែមេសា ឆ្នាំ២០២៦ បញ្ជាការដ្ឋានកងរាជអាវុធហត្ថខេត្តកំពង់ស្ពឺ បានទទួលបណ្ដឹងពីជនរងគ្រោះ តាមរយៈប្រព័ន្ធ Hotline 1292 (លេខអន្តរាគមន៍បន្ទាន់)។

ក្រោយទទួលព័ត៌មានភ្លាមៗ កម្លាំងមន្ទីរស្រាវជ្រាវ និងបង្ក្រាបបទល្មើសបានសហការជាមួយកម្លាំងមូលដ្ឋានកងរាជអាវុធហត្ថស្រុកសំរោងទង ចុះអន្តរាគមន៍ និងបង្ក្រាបជាក់ស្តែង ករណីជនម្នាក់បែកថ្នាំ បង្កអុកឡុក មិនអនុញ្ញាតឱ្យប្រព្រឹត្តពិធីបុណ្យសព។

ហេតុការណ៍នេះបានកើតឡើងនៅវេលាម៉ោង ១២:១៥នាទី ថ្ងៃទី០៦ ខែមេសា ឆ្នាំ២០២៦ នៅភូមិឧញ្ញាទេព ឃុំត្រពាំងគង ស្រុកសំរោងទង ខេត្តកំពង់ស្ពឺ។ ជាលទ្ធផល សមត្ថកិច្ចបានធ្វើការឃាត់ខ្លួនជនសង្ស័យឈ្មោះ ផូ ផារត់ ភេទប្រុស អាយុ ២៩ឆ្នាំ រស់នៅទីកន្លែងកើតហេតុ។

វត្ថុតាងដកហូតរួមមាន៖ *កាំបិតផ្គាក់ចំនួន០១ដើម,*កាំបិតដងដែក ចំនួន០១ដើម,*កូនកាំបិតចំនួន០១ដើម។

បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញកំពុងចាត់ការតាមនីតិវិធីច្បាប់។

ករណីខាងលើនេះ គឺជាឧទាហរណ៍ច្បាស់លាស់មួយ បង្ហាញពីប្រសិទ្ធភាពនៃប្រព័ន្ធ Hotline 1292 ដែលអាចទទួលព័ត៌មាន និងចាត់វិធានការបានភ្លាមៗ បង្ការមិនឲ្យបញ្ហាតូចក្លាយជាបញ្ហាធំ និងរក្សាសន្តិសុខសង្គមឲ្យមានស្ថិរភាព។

គួរបញ្ជាក់ថា ជោគជ័យនៃប្រព័ន្ធនេះ កើតចេញពីការដឹកនាំដ៏មានទិសដៅច្បាស់លាស់ និងការយកចិត្តទុកដាក់ខ្ពស់របស់ លោកឧត្ដមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺដែលបានជំរុញឲ្យមានការប្រើប្រាស់ប្រព័ន្ធបច្ចេកវិទ្យាទំនើប ដើម្បីបម្រើប្រជាពលរដ្ឋឲ្យបានលឿន ទាន់ពេល និងមានប្រសិទ្ធភាព។

ប្រព័ន្ធ Hotline 1292 កំពង់ស្ពឺ មិនត្រឹមតែជាលេខទូរស័ព្ទសម្រាប់រាយការណ៍បញ្ហាទេ ប៉ុន្តែជាស្ពានភ្ជាប់សន្តិសុខរវាងអាជ្ញាធរ និងប្រជាពលរដ្ឋ ដែលគួរឲ្យទទួលស្គាល់ និងលើកសរសើរយ៉ាងខ្លាំង៕
IMG_1318 IMG_1664 IMG_1663