លោកឧត្តមសេនីយ៍ទោ ឈឿន សុចិត្ត បានអញ្ជើញអមដំណើរ ឯកឧត្ដមអភិសន្តិបណ្ឌិត ស សុខា អញ្ជើញសម្ពោធដាក់ឱ្យប្រើប្រាស់អគារមត្តេយ្យសិក្សា១ខ្នងនិងពិសាអាហារសាមគ្គីជាមួយលោកគ្រូ អ្នកគ្រូ សិស្សានុសិស្ស និងអាណាព្យាបាលនៅព្រៃវែង

(ព្រៃវែង)៖ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល នាថ្ងៃទី៧ ខែមេសា​ ឆ្នាំ២០២៦នេះ បានអញ្ជើញអមដំណើរ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែងនិងលោកជំទាវ កែ សួនសុភី ស សុខា អញ្ជើញជាអធិបតីដ៏ខ្ពង់ខ្ពស់សម្ពោធដាក់ឱ្យប្រើប្រាស់អគារមត្តេយ្យសិក្សា១ខ្នង មាន៤បន្ទប់ និងពិសាអាហារសាមគ្គីជាមួយលោកគ្រូ អ្នកគ្រូ សិស្សានុសិស្ស និងអាណាព្យាបាល នៅសាលាមត្តេយ្យសិក្សាពោធិ៍អណ្តោត ស្ថិតក្នុងភូមិពោធិអណ្តោត ឃុំជើងភ្នំ ស្រុកបាភ្នំ ខេត្តព្រៃវែង ដោយមានការអញ្ជើញចូលរួមពីថ្នាក់ដឹកនាំពាក់ព័ន្ធជាច្រើនរូប។

ក្នុងឱកាសនោះ ឯកឧត្ដមអភិសន្តិបណ្ឌិត ស សុខា បានអំពាវនាវយ៉ាងម៉ឺងម៉ាត់ដល់អាណាព្យាបាលគ្រប់រូប ឱ្យយកចិត្តទុកដាក់បញ្ជូនកូន ប្អូន ឬក្មួយ ដែលគ្រប់អាយុចូលរៀន ទៅចុះឈ្មោះសិក្សាឱ្យបានទាន់ពេលវេលា ដើម្បីកសាងមូលដ្ឋានគ្រឹះចំណេះដឹង និងបង្កើតអនាគតដ៏ភ្លឺស្វាងសម្រាប់កុមារគ្រប់រូប។ឯកឧត្តមបានគូសបញ្ជាក់ថា កុមារគឺដូចជាក្រដាសសមួយផ្ទាំង ដែលងាយទទួលយកការអប់រំ និងការបណ្ដុះបណ្ដាល។ ប្រសិនបើមានការបង្រៀនត្រឹមត្រូវតាំងពីវ័យក្មេង ពួកគេនឹងក្លាយជាពលរដ្ឋល្អ មានទាំងចំណេះដឹង សមត្ថភាព និងសីលធម៌ ដើម្បីបន្តវេនក្នុងការអភិវឌ្ឍ និងការពារមាតុភូមិ។

ជាមួយគ្នានេះ ប្រមុខក្រសួងមហាផ្ទៃក៏បានលើកឡើងថា កុមារដែលបានឆ្លងកាត់ការសិក្សានៅថ្នាក់មត្តេយ្យ មានឱកាសខ្ពស់ក្នុងការសិក្សាបន្តដោយរលូន និងជោគជ័យ ដោយសារមានមូលដ្ឋានគ្រឹះច្បាស់លាស់ មានវិន័យ និងភាពក្លាហានក្នុងការសិក្សា។

ឯកឧត្តមបន្តថា ការសម្ពោធអគារសិក្សាថ្មីនេះ មានសារៈសំខាន់យ៉ាងខ្លាំង ក្នុងការលើកកម្ពស់គុណភាពវិស័យអប់រំនៅមូលដ្ឋាន និងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ ក្នុងការបញ្ជូនកុមារចូលរៀនក្នុងបរិយាកាសសិក្សាដែលមានសុវត្ថិភាព និងមានស្តង់ដារ។

លើសពីនេះ អគារមត្តេយ្យសិក្សាថ្មី មិនត្រឹមតែជាសំណង់បេតុងទេ ប៉ុន្តែជាថ្នាលបណ្ដុះពូជចំណេះដឹងសម្រាប់កុមារ ដែលនឹងជួយបង្កើនឱកាសសិក្សា ស្មើភាព និងសម្រាលបន្ទុកអាណាព្យាបាល ស្របតាមគោលនយោបាយអភិវឌ្ឍមូលធនមនុស្សរបស់រាជរដ្ឋាភិបាល។

ក្នុងឱកាសនេះផងដែរ ឯកឧត្ដមអភិសន្តិបណ្ឌិតបានថ្លែងអំណរគុណដល់សប្បុរសជន រដ្ឋបាលខេត្តព្រៃវែង អាជ្ញាធរស្រុកបាភ្នំ មន្ទីរអប់រំ យុវជន និងកីឡា ក៏ដូចជាគ្រូបង្រៀន និងអាជ្ញាធរពាក់ព័ន្ធទាំងអស់ ដែលបានរួមចំណែកយ៉ាងសកម្ម ក្នុងការអភិវឌ្ឍវិស័យអប់រំនៅមូលដ្ឋាន ឱ្យកាន់តែរីកចម្រើនជាបន្តបន្ទាប់ បង្ហាញពីសាមគ្គីភាពក្នុងការកសាងអនាគតកុមារកម្ពុជា ឱ្យកាន់តែភ្លឺស្វាង និងរុងរឿង៕