បង្ក្រាបក្រុមឆបោក Online Scam អន្តរជាតិ ៨នាក់ នៅខណ្ឌសែនសុខ សមត្ថកិច្ចបន្តពង្រឹងច្បាប់ដោយគ្មានការយោគយល់

(ភ្នំពេញ)៖ កម្លាំងសមត្ថកិច្ចរាជធានីភ្នំពេញ បានបន្តបង្ហាញភាពម៉ឺងម៉ាត់ក្នុងការបង្ក្រាបបទល្មើសបច្ចេកវិទ្យា ដោយបានឃាត់ខ្លួនជនសង្ស័យសរុប ៨នាក់ ក្នុងនោះជនជាតិជប៉ុន ៥នាក់ និងជនជាតិចិន ៣នាក់ ពាក់ព័ន្ធករណីឆបោកតាមប្រព័ន្ធបច្ចេកវិទ្យា (Online Scam) កាលពីព្រឹកថ្ងៃទី០៦ ខែមេសា ឆ្នាំ២០២៦ នៅអគារខុនដូ JD Polman ស្ថិតក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។

ប្រតិបត្តិការនេះ ត្រូវបានអនុវត្តក្រោមការដឹកនាំបញ្ជាដោយផ្ទាល់ពី ឯកឧត្តម ឃួង ស្រេង អភិបាលរាជធានីភ្នំពេញ និងឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដោយមានការសហការជិតស្និទ្ធពីអាជ្ញាធរខណ្ឌសែនសុខ និងសម្របសម្រួលនីតិវិធីដោយលោក ជា សា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។

ក្នុងប្រតិបត្តិការត្រួតពិនិត្យ កម្លាំងជំនាញបានរកឃើញ និងដកហូតវត្ថុតាងជាច្រើនដែលពាក់ព័ន្ធនឹងសកម្មភាពឆបោក រួមមាន ទូរសព្ទចំនួន ១៤គ្រឿង, CPU ១គ្រឿង, ម៉ូនីទ័រ ១គ្រឿង, iPad ចំនួន ៣គ្រឿង ព្រមទាំងឧបករណ៍ និងឯកសារក្លែងក្លាយជាច្រើន ដូចជា អាវនគរបាលជប៉ុន ៥ ឈុត មួកនគរបាល ២ និងឯកសារក្លែងក្លាយប្រភេទបណ្តឹង កិច្ចសន្យា និងដីការចាប់ខ្លួន។

តាមលទ្ធផលស្រាវជ្រាវបឋម បានបង្ហាញថា ជនសង្ស័យជាជនជាតិជប៉ុន បានយកទឹកដីកម្ពុជាជាគោលដៅប្រព្រឹត្តបទល្មើស ដោយប្រើបច្ចេកវិទ្យាក្លែងបន្លំជាសមត្ថកិច្ចជប៉ុន និងប្រើប្រាស់ឯកសារក្លែងក្លាយ ដើម្បីបោកប្រាស់ជនរងគ្រោះនៅប្រទេសជប៉ុន ដែលជាទម្រង់ឧក្រិដ្ឋកម្មឆ្លងដែនមានលក្ខណៈស្មុគស្មាញ និងគ្រោះថ្នាក់ខ្ពស់។

បច្ចុប្បន្ន ជនសង្ស័យ និងវត្ថុតាងទាំងអស់ ត្រូវបានបញ្ជូនទៅកាន់ការិយាល័យជំនាញ ដើម្បីបន្តនីតិវិធីច្បាប់ ខណៈសមត្ថកិច្ចកំពុងពង្រីកការស្រាវជ្រាវស្វែងរកបក្ខពួកពាក់ព័ន្ធផ្សេងទៀត។

ជាមួយគ្នានេះដែរ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់យ៉ាងតឹងរ៉ឹងថា កម្ពុជា មិនអនុញ្ញាតឲ្យក្លាយជាទីតាំងសម្រាប់ឧក្រិដ្ឋជនបច្ចេកវិទ្យា ប្រើប្រាស់ក្នុងសកម្មភាពឆបោក ឬបទល្មើសឆ្លងដែនឡើយ។ រាល់បុគ្គល ឬបណ្ដាញណាដែលពាក់ព័ន្ធ នឹងត្រូវប្រឈមមុខនឹងវិធានការផ្លូវច្បាប់យ៉ាងតឹងរ៉ឹង ដោយគ្មានការយោគយល់ ឬអន្តរាគមន៍។

វិធានការយ៉ាងម៉ឺងម៉ាត់ និងសកម្មភាពបង្ក្រាបជាបន្តបន្ទាប់នេះ ត្រូវបានរំពឹងថា នឹងចូលរួមសំខាន់ក្នុងការកាត់បន្ថយ និងលុបបំបាត់បទល្មើសឆបោកតាមប្រព័ន្ធបច្ចេកវិទ្យា ក្នុងប្រទេសកម្ពុជា ឲ្យបានប្រសើរឡើងក្នុងរយៈពេលខាងមុខ៕