បង្ក្រាបបណ្ដាញគ្រឿងញៀនដ៏ធំមួយ នៅសណ្ឋាគារស៊ីជី ខេត្តព្រះសីហនុ ឃាត់ខ្លួនជនសង្ស័យ២២នាក់ និងដកហូតសារធាតុញៀនជាង៨៩គីឡូក្រាម

(ព្រះសីហនុ)៖ កម្លាំងកងរាជអាវុធហត្ថខេត្តព្រះសីហនុ បានបើកប្រតិបត្តិការបង្ក្រាបករណីផលិត ជួញដូរ និងរក្សាទុកសារធាតុញៀនដោយខុសច្បាប់មួយករណីដ៏ធំ នៅចំណុចសណ្ឋាគារស៊ីជី ស្ថិតក្នុងភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីថ្ងៃទី៣១ ខែមីនា ឆ្នាំ២០២៦ ដោយឃាត់ខ្លួនជនសង្ស័យសរុបចំនួន២២នាក់ (ស្រី៣នាក់) និងដកហូតវត្ថុតាងជាច្រើន។

យោងតាមការបញ្ជាក់របស់លោកឧត្តមសេនីយ៍ត្រី ហេង ប៊ុនទី មេបញ្ជាការអាវុធហត្ថខេត្តព្រះសីហនុ បានឱ្យដឹងថា ប្រតិបត្តិការនេះ អនុវត្តតាមបទបញ្ជាដ៏ខ្ពង់ខ្ពស់របស់នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការអាវុធហត្ថលើផ្ទៃប្រទេស ព្រមទាំងមានការគាំទ្រពីអភិបាលខេត្តព្រះសីហនុ លោក ម៉ាង ស៊ីណេត។

នៅវេលាម៉ោងប្រហែល ១៧:៣០នាទី ថ្ងៃដដែល កម្លាំងអាវុធហត្ថខេត្តចំនួន៤០នាក់ ដឹកនាំដោយលោកវរសេនីយ៍ទោ សួ ស៊ន និងមានការសម្របសម្រួលនីតិវិធីដោយលោក វុធ សាវី ព្រះរាជអាជ្ញារង អមសាលាដំបូងខេត្ត បានចុះបង្ក្រាបទីតាំងខាងលើ ដោយឃាត់ខ្លួនជនសង្ស័យចំនួន២២នាក់ រួមមាន ជនជាតិចិន ១៨នាក់, ជនជាតិវៀតណាម ១នាក់ (ស្រី) និងជនជាតិខ្មែរ ៣នាក់ (ស្រី១នាក់)។

ក្នុងប្រតិបត្តិការនេះ សមត្ថកិច្ចបានដកហូតសារធាតុញៀនជាច្រើនប្រភេទ រួមមាន ហេរ៉ូអ៊ីន, កូកាអ៊ីន, កេតាមីន, មេតំហ្វេតាមីន និងអ៊ិចស្តាស៊ី ព្រមទាំងកញ្ញាក្រៀម និងសារធាតុផ្សំជាច្រើន ដែលមានទម្ងន់សរុបសារធាតុញៀនសុទ្ធប្រមាណជាង ៨៩គីឡូក្រាម និងសារធាតុគីមីផ្សំជាច្រើនសរុបជាង ៩០គីឡូក្រាម។

ក្រៅពីនេះ ក៏មានការដកហូតរថយន្តចំនួន៦គ្រឿង ម៉ូតូ៤គ្រឿង អាវុធខ្លី១ដើម គ្រាប់អាវុធ និងគ្រាប់បែកដៃ ព្រមទាំងឧបករណ៍ផលិត និងសម្ភារៈកែច្នៃគ្រឿងញៀនជាច្រើនទៀត ទូរស័ព្ទ៣៣គ្រឿង និងឯកសារផ្សេងៗដែលពាក់ព័ន្ធ។

តាមការស្រាវជ្រាវ និងសារភាពរបស់ជនសង្ស័យ សមត្ថកិច្ចបានកំណត់អត្តសញ្ញាណបុគ្គលម្នាក់ឈ្មោះ YU ZHI HUI ជាជនជាតិចិន ដែលសង្ស័យថាជាមេខ្លោងដ៏សំខាន់ក្នុងបណ្ដាញនេះ បច្ចុប្បន្នកំពុងរត់គេចខ្លួន។

បច្ចុប្បន្ន ជនសង្ស័យទាំង២២នាក់ ត្រូវបានកម្លាំងជំនាញកសាងសំណុំរឿង បញ្ជូនទៅតុលាការ ដើម្បីចាត់ការតាមនីតិវិធីច្បាប់ ពាក់ព័ន្ធនឹងបទល្មើសផលិត ជួញដូរ និងរក្សាទុកសារធាតុញៀនដោយខុសច្បាប់។

អាជ្ញាធរ និងសមត្ថកិច្ចពាក់ព័ន្ធ បានបន្តអំពាវនាវដល់ប្រជាពលរដ្ឋ សហការផ្តល់ព័ត៌មាន ដើម្បីរួមចំណែកទប់ស្កាត់ និងបង្ក្រាបបទល្មើសគ្រឿងញៀន ដែលជាហានិភ័យធ្ងន់ធ្ងរដល់សង្គម និងសុវត្ថិភាពសាធារណៈ៕