រដ្ឋមន្ត្រី ហេង សួរ បញ្ជាក់តួនាទីអតីតនិស្សិតជប៉ុន ក្នុងការកសាងជាតិ!

(ភ្នំពេញ)៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ពីតួនាទីដ៏សំខាន់របស់អតីតនិស្សិតខ្មែរដែលបានបញ្ចប់ការសិក្សាពីប្រទេសជប៉ុន ក្នុងការចូលរួមអភិវឌ្ឍប្រទេសជាតិ និងដើរតួនាទីជាស្ពានតភ្ជាប់ទំនាក់ទំនងយ៉ាងរឹងមាំរវាងកម្ពុជា និងជប៉ុន។

ការលើកឡើងនេះ ត្រូវបានធ្វើឡើងក្នុងឱកាសឯកឧត្តម អញ្ជើញចូលរួមពិធីជួបជុំអបអរសាទរបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ របស់សមាគមអតីតនិស្សិតខ្មែរពីប្រទេសជប៉ុន (JAC) ដែលបានប្រារព្ធឡើងនាល្ងាចថ្ងៃទី៣ ខែមេសា ឆ្នាំ២០២៦ នៅសណ្ឋាគារ Raffles Hotel Le Royal។

ពិធីដ៏មានអត្ថន័យនេះ ក៏មានការចូលរួមជាកិត្តិយសពីឯកឧត្តម អ៊ូអិណុ អាត់ស៊ូស៊ី (UENO Atsushi) ឯកអគ្គរាជទូតជប៉ុនប្រចាំកម្ពុជា រួមជាមួយថ្នាក់ដឹកនាំរាជរដ្ឋាភិបាល ថ្នាក់ដឹកនាំសមាគម JAC និងអតីតនិស្សិតខ្មែរពីប្រទេសជប៉ុនសរុបជាង ១០០រូប។

ថ្លែងក្នុងនាមជាអតីតនិស្សិតមួយរូបដែលធ្លាប់បានសិក្សានៅប្រទេសជប៉ុន ឯកឧត្តម ហេង សួរ បានបង្ហាញក្តីសោមនស្សរីករាយចំពោះជំនួបនេះ ដោយចាត់ទុកថា មិនត្រឹមតែជាការរឹតបន្តឹងចំណងមិត្តភាពរវាងអតីតនិស្សិតប៉ុណ្ណោះទេ ប៉ុន្តែថែមទាំងជាការឆ្លុះបញ្ចាំងពីទំនាក់ទំនង “ប្រជាជន និងប្រជាជន” ដែលជាមូលដ្ឋានគ្រឹះសម្រាប់ការពង្រឹងភាពជាដៃគូយុទ្ធសាស្ត្ររវាងប្រទេសទាំងពីរ។

ឯកឧត្តមរដ្ឋមន្ត្រី បានសង្កត់ធ្ងន់បន្ថែមថា ប្រព័ន្ធអប់រំរបស់ប្រទេសជប៉ុន បានរួមចំណែកយ៉ាងសំខាន់ក្នុងការកសាងសមត្ថភាពវិជ្ជាជីវៈ និងបុគ្គលិកលក្ខណៈរបស់និស្សិតខ្មែរ ធ្វើឱ្យពួកគេក្លាយជាធនធានមនុស្សមានគុណភាពខ្ពស់ និងជាអ្នកដឹកនាំដ៏ឆ្នើមសម្រាប់ប្រទេសជាតិ។ ជាក់ស្តែង បច្ចុប្បន្ន មានអតីតនិស្សិតជប៉ុនជាច្រើនកំពុងកាន់តួនាទីជាថ្នាក់ដឹកនាំកំពូលៗ រួមមាន អនុប្រធានទី២នៃព្រឹទ្ធសភា រដ្ឋមន្ត្រីចំនួន៣រូប និងមន្ត្រីជាន់ខ្ពស់ជាច្រើនរូបទៀត។

ក្នុងឱកាសនោះផងដែរ ឯកឧត្តម បានរំលឹកដល់ប្រសាសន៍ដ៏មានន័យជ្រាលជ្រៅរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានលើកឡើងថា ការទៅសិក្សានៅប្រទេសជប៉ុនរបស់និស្សិតកម្ពុជា មិនត្រឹមតែសម្រាប់ការទទួលបានចំណេះដឹងប៉ុណ្ណោះទេ ប៉ុន្តែជាដំណើរកសាងស្ពានទំនាក់ទំនងយូរអង្វែងរវាងប្រទេសទាំងពីរ។

យោងតាមទិន្នន័យបច្ចុប្បន្ន តាមរយៈកម្មវិធីអាហារូបករណ៍ MEXT, JDS និង JICA ដែលគាំទ្រដោយរាជរដ្ឋាភិបាល និងប្រជាជនជប៉ុន មាននិស្សិតខ្មែរជាង ១,០០០នាក់ បានបញ្ចប់ការសិក្សាដោយជោគជ័យ ខណៈជាង ៦០០នាក់ផ្សេងទៀតកំពុងបន្តការសិក្សា ដែលសុទ្ធសឹងជាតំណាងវប្បធម៌ និងជាគ្រឿងភ្ជាប់ទំនាក់ទំនងដ៏សំខាន់រវាងកម្ពុជា និងជប៉ុន។

នៅចុងបញ្ចប់ ក្នុងឱកាសឈានចូលឆ្នាំថ្មីប្រពៃណីជាតិខ្មែរ ឯកឧត្តម ហេង សួរ បានជូនពរដល់អង្គពិធីទាំងមូល និងថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ស្ថានទូត និងប្រជាជនជប៉ុន ដែលតែងតែគាំទ្រ និងផ្តល់ឱកាសអប់រំដ៏មានតម្លៃដល់យុវជនកម្ពុជា ជាបន្តបន្ទាប់៕