ខេត្តព្រះសីហនុបន្តវាយខ្ទប់បណ្តាញ Online Scam ដកហូតឧបករណ៍រាប់រយ ក្រោមយុទ្ធនាការរឹតបន្តឹងសន្តិសុខ

(ព្រះសីហនុ)៖ ក្នុងក្របខណ្ឌយុទ្ធនាការរឹតបន្តឹងសន្តិសុខ និងសណ្តាប់ធ្នាប់សាធារណៈ កម្លាំងសមត្ថកិច្ចចម្រុះ នៃគណៈបញ្ជាការឯកភាពរដ្ឋបាលខេត្តព្រះសីហនុ បន្តបង្ហាញសកម្មភាពយ៉ាងតឹងរឹង ដោយចុះត្រួតពិនិត្យ និងបង្ក្រាបទីតាំងសង្ស័យពាក់ព័ន្ធនឹងបទល្មើសឆបោកតាមប្រព័ន្ធអនឡាញ (Online Scams) ជាបន្តបន្ទាប់។

យោងតាមរបាយការណ៍ថ្ងៃទី២៦ ខែមីនា ឆ្នាំ២០២៦ បានបញ្ជាក់ថា ក្រុមការងារសមត្ថកិច្ចបានចុះត្រួតពិនិត្យលំនៅឋានសង្ស័យចំនួន ៨០ខ្នង ស្ថិតនៅក្នុងបុរី គុជ អាស៊ី ភូមិ២ សង្កាត់លេខ៣ ក្រុងព្រះសីហនុ។ ជាលទ្ធផល កម្លាំងបានដកហូតវត្ថុតាងសង្ស័យរួមមាន កុំព្យូទ័រ ១៣៣គ្រឿង ទូរសព្ទដៃ ៤៣៩គ្រឿង និងកាំភ្លើងខ្យល់ ៥ដើម ដែលត្រូវបានយកទៅរក្សាទុកសម្រាប់ការស្រាវជ្រាវបន្ថែមតាមនីតិវិធីច្បាប់។

ក្នុងប្រតិបត្តិការត្រួតពិនិត្យជុំទី៣ នៅកាស៊ីណូ «ជីនយូមេនតាំង» ភូមិ៤ សង្កាត់លេខ៤ ក្រុងព្រះសីហនុ សមត្ថកិច្ចបានប្រទះឃើញជនសង្ស័យចំនួន ៩នាក់ ពាក់ព័ន្ធនឹងសកម្មភាពឆបោកតាមប្រព័ន្ធអនឡាញ។ ជាមួយគ្នានេះ វត្ថុតាងដូចជា កុំព្យូទ័រ និងទូរសព្ទដៃ ត្រូវបានប្រមូលដាក់ជាភស្តុតាង ខណៈជនសង្ស័យទាំងអស់ត្រូវបានប្រគល់ជូនស្នងការដ្ឋាននគរបាលខេត្ត ដើម្បីបន្តសាកសួរ និងកសាងសំណុំរឿងបញ្ជូនទៅតុលាការ។

គិតត្រឹមថ្ងៃទី២៦ ខែមីនា ឆ្នាំ២០២៦ សមត្ថកិច្ចចម្រុះបានបង្ក្រាបទីតាំងពាក់ព័ន្ធនឹងបទល្មើស Online Scam បានចំនួន ១៦ទីតាំង ក្នុងចំណោមទីតាំងសង្ស័យសរុប ៥៩៦កន្លែង ដែលត្រូវបានត្រួតពិនិត្យក្រោមការអនុវត្តអនុក្រឹត្យលេខ០៣។

ជាមួយគ្នានេះ លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា បានឱ្យដឹងថា ចាប់ពីឆ្នាំ២០២៥ ដល់សប្តាហ៍ទី២ ខែមីនា ឆ្នាំ២០២៦ អាជ្ញាធរបានបង្ក្រាប និងបិទខ្ទប់ទីតាំងពាក់ព័ន្ធចំនួន ២៣៦កន្លែង នៅទូទាំងប្រទេស ដែលក្នុងនោះរួមមាន កាស៊ីណូ ៩១កន្លែង និងទីតាំងប្រភេទបុរី វីឡា ខុនដូ និងលំនៅឋាន ១៤៥កន្លែង។

តាមរបាយការណ៍ក្រសួងយុត្តិធម៌បង្ហាញថា ក្នុងរយៈពេល ៨ខែចុងក្រោយ តុលាការកម្ពុជាបានចាត់វិធានការផ្លូវច្បាប់លើសំណុំរឿង Online Scam ចំនួន ៧៩សំណុំរឿង ដោយបានផ្តន្ទាទោសមេខ្លោង និងបក្ខពួកសរុប ៦៩៧នាក់ ដែលមានសញ្ជាតិចម្រុះ។ ខណៈអាជ្ញាធរក៏បានកត់សម្គាល់ថា មានមនុស្សពាក់ព័ន្ធជាង ២២ម៉ឺននាក់ បានគេចខ្លួនចេញពីប្រទេសកម្ពុជា តាមទាំងផ្លូវអាកាស និងផ្លូវគោក។

ក្នុងនាមជាមេដឹកនាំរាជរដ្ឋាភិបាល សម្ដេចធិបតី ហ៊ុន ម៉ាណែត បានបង្ហាញចំណុចឈរយ៉ាងច្បាស់ថា កម្ពុជាមិនអនុញ្ញាតឱ្យក្លាយជាគោលដៅសម្រាប់បណ្តាញឧក្រិដ្ឋកម្មបច្ចេកវិទ្យាទៀតឡើយ។ សម្តេចបានប្ដេជ្ញាចិត្តបន្តយុទ្ធនាការបោសសម្អាតឱ្យបានសម្រេចក្នុងកំណត់ពេលកំណត់ ហើយបញ្ជាក់ថា បុគ្គល ឬអង្គភាពណាដែលពាក់ព័ន្ធ នឹងត្រូវប្រឈមមុខនឹងទោសទណ្ឌខ្ពស់បំផុត ដោយគ្មានការយោគយល់ ឬអន្តរាគមន៍ណាមួយឡើយ៕