ឯកឧត្តម នាយឧត្តមសេនីយ៍ ឈន សារ៉ាណេ អញ្ជើញចូលរួមវេទិកាថវិកាសាធារណៈឆ្នាំ២០២៦ ខណៈក្រសួងកសិកម្មជំរុញ “មានហូប មានបាន មានប្រើ មានរហូត” ដើម្បីសន្តិសុខស្បៀង និងនិរន្តរភាពសេដ្ឋកិច្ច

(ភ្នំពេញ)៖  ឯកឧត្តម នាយឧត្តមសេនីយ៍ ឈន សារ៉ាណេ ក្នុងនាមក្រសួងមហាផ្ទៃ នាព្រឹកថ្ងៃសុក្រ ទី២៧ ខែមីនា ឆ្នាំ២០២៦ បានអញ្ជើញចូលរួមវេទិកាសាធារណៈស្តីពីការផ្សព្វផ្សាយថវិកាសមិទ្ធកម្មឆ្នាំ២០២៦ និងសៀវភៅថវិកាពលរដ្ឋ ក្រោមអធិបតីភាពរបស់ឯកឧត្តមរដ្ឋមន្ត្រី ឌិត ទីណា នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ថ្លែងក្នុងវេទិកា ឯកឧត្តមរដ្ឋមន្ត្រីបានលើកឡើងពីការអនុវត្តគោលនយោបាយអាទិភាពទី៥ និងទី៦ និងបានជម្រាបពីការចូលរួមសកម្មរបស់ក្រសួងកសិកម្មក្នុងកម្មវិធីកែទម្រង់ហិរញ្ញវត្ថុសាធារណៈ ដំណាក់កាលទី៤ ដែលផ្តោតលើការកែលម្អគណនេយ្យភាពសមិទ្ធកម្ម ប្រសិទ្ធភាពសេដ្ឋកិច្ច និងការតភ្ជាប់គោលដៅថវិកាជាមួយលទ្ធផលអនុវត្តជាក់ស្តែងរបស់រាជរដ្ឋាភិបាល។

ឯកឧត្តម ឌិត ទីណា ក៏បានសង្កត់ធ្ងន់លើទិសដៅអភិវឌ្ឍន៍កសិកម្មតាមគន្លង “មានហូប មានបាន មានប្រើ និងមានរហូត” ដោយបញ្ជាក់ថា “មានហូប” គឺធានាសន្តិសុខស្បៀង និងជំរុញផលិតកម្មកសិផលយុទ្ធសាស្ត្រ ខណៈ “មានបាន” គឺលើកកម្ពស់ជីវភាពប្រជាកសិករ និងបង្កើតមូលដ្ឋានសម្រាប់ជំនាន់ក្រោយអភិវឌ្ឍទៅវិស័យឧស្សាហកម្ម និងសេវាកម្ម។ ចំណែក “មានប្រើ និងមានរហូត” គឺផ្តោតលើការធានាផលិតផលគ្រប់គ្រាន់ ការអភិរក្សធនធានធម្មជាតិ និងការអភិវឌ្ឍប្រកបដោយនិរន្តរភាពទាំងសេដ្ឋកិច្ច និងបរិស្ថាន។

តាមរយៈវេទិកានេះ ក្រសួងបានគូសបញ្ជាក់កម្មវិធីសំខាន់ចំនួន៣ រួមមាន ការអភិវឌ្ឍខ្សែច្រវាក់តម្លៃកសិកម្ម ការគ្រប់គ្រងធនធានធម្មជាតិកសិកម្ម និងការពង្រឹងស្ថាប័ន និងសេវាគាំទ្រពាក់ព័ន្ធ ដើម្បីធានាថាមន្រ្តីអាចផ្តល់សេវាសាធារណៈមានគុណភាពជូនប្រជាកសិករ និងបង្កើតផលចំណេញរួមសម្រាប់ភាគីពាក់ព័ន្ធទាំងអស់។

ឯកឧត្តមរដ្ឋមន្ត្រីបានអំពាវនាវឱ្យអង្គវេទិកាទាំងមូលបើកចំហរចូលរួមពិភាក្សា ផ្តល់មតិយោបល់ និងធាតុចូលសំខាន់ៗ ដើម្បីធានាថាការអនុវត្តថវិកាសមិទ្ធកម្ម និងគោលនយោបាយនានា អាចសម្រេចបានលទ្ធផលជាក់ស្តែង និងនាំមកនូវការអភិវឌ្ឍប្រកបដោយប្រសិទ្ធភាពសម្រាប់វិស័យកសិកម្មកម្ពុជា៕