បង្ក្រាបគ្រឿងញៀនទ្រង់ទ្រាយធំ ជាង១៥គីឡូក្រាម នៅតាកែវ ពន្លាតប្រតិបត្តិការដល់ភ្នំពេញ ឃាត់ខ្លួនជនសង្ស័យ៦នាក់

(តាកែវ)៖ កម្លាំងជំនាញកងរាជអាវុធហត្ថខេត្តតាកែវ បានបើកប្រតិបត្តិការបង្ក្រាបបទល្មើសគ្រឿងញៀនទ្រង់ទ្រាយធំ ដោយពន្លាតដែនសមត្ថកិច្ចចូលរួមសហការជាមួយអង្គភាពពាក់ព័ន្ធនៅរាជធានីភ្នំពេញ រហូតឈានដល់ការឃាត់ខ្លួនជនសង្ស័យចំនួន៦នាក់ និងដកហូតគ្រឿងញៀនសរុបជាង១៥គីឡូក្រាម។

ប្រតិបត្តិការនេះ បានអនុវត្តឡើងក្រោមបទបញ្ជារបស់លោកឧត្តមសេនីយ៍ត្រី សេង មហា មេបញ្ជាការ កងរាជអាវុធហត្ថខេត្តតាកែវ និងសម្របសម្រួលនីតិវិធីដោយឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ។ នៅវេលាម៉ោង ០៦:៤០នាទី ព្រឹកថ្ងៃទី២១ ខែមីនា ឆ្នាំ២០២៦ កម្លាំងមន្ទីរស្រាវជ្រាវ និងបង្រ្កាបបទល្មើស ដឹកនាំដោយលោកវរសេនីយ៍ឯក កែន វណ្ណៈ មេបញ្ជាការរង បានចុះបង្ក្រាបករណីដឹកជញ្ជូន រក្សាទុក ជួញដូរ និងប្រើប្រាស់ដោយខុសច្បាប់នូវសារធាតុញៀន នៅភូមិមហាសេនា ឃុំតាភេម ស្រុកត្រាំកក់ ខេត្តតាកែវ។

បន្ទាប់មក សមត្ថកិច្ចបានពន្លាតប្រតិបត្តិការទៅរាជធានីភ្នំពេញ ដោយសហការជាមួយកងរាជអាវុធហត្ថលើផ្ទៃប្រទេស និងកងរាជអាវុធហត្ថរាជធានីភ្នំពេញ ដឹកនាំរួមដោយលោកវរសេនីយ៍ទោ អ៊ួង វិរៈរត្ន័មុន្នី និងមានការសម្របសម្រួលនីតិវិធីដោយលោក ស៊ីន រក្សា ព្រះរាជអាជ្ញារង អមសាលាដំបូងរាជធានីភ្នំពេញ។ ប្រតិបត្តិការនេះបានចុះបង្ក្រាបចំនួន២ទីតាំង គឺនៅសង្កាត់ក្រាំងធ្នង់ ខណ្ឌសែនសុខ និងសង្កាត់ស្នោរ ខណ្ឌកំបូល។

លទ្ធផល ប្រតិបត្តិការបានឃាត់ខ្លួនជនសង្ស័យសរុប៦នាក់ ក្នុងនោះមានស្ត្រី២នាក់ ដែលសុទ្ធសឹងមានមុខរបរមិនពិតប្រាកដ និងពាក់ព័ន្ធនឹងបណ្ដាញជួញដូរគ្រឿងញៀន។

ក្នុងនោះ សមត្ថកិច្ចបានដកហូតវត្ថុតាងសំខាន់ៗរួមមាន មេតំហ្វេតាមីន (MET) ជាប្រភេទម្សៅ និងថ្នាំគ្រាប់សរុបជាង១៤គីឡូក្រាម កេតាមីន (KETAMINE) ជាង១គីឡូក្រាម រថយន្ត១គ្រឿង ម៉ូតូ៣គ្រឿង ទូរស័ព្ទ៩គ្រឿង ជញ្ជីងថ្លឹងថ្នាំញៀន ឧបករណ៍វេចខ្ចប់ និងសម្ភារៈពាក់ព័ន្ធមួយចំនួនទៀត ព្រមទាំងអាវុធកែច្នៃ១ដើម។

បច្ចុប្បន្ន ជនសង្ស័យ និងវត្ថុតាងទាំងអស់ ត្រូវបានការិយាល័យជំនាញកំពុងកសាងសំណុំរឿង ដើម្បីបញ្ជូនទៅសាលាដំបូងខេត្តតាកែវ ចាត់ការតាមនីតិវិធីច្បាប់៕