កម្ពុជា–Toyota ចុះហត្ថលេខា MoU បង្កើតមជ្ឈមណ្ឌលបណ្តុះបណ្តាលរួម ជំរុញជំនាញយុវជនឆ្ពោះស្តង់ដារអន្តរជាតិ!

(ភ្នំពេញ)៖ នៅរសៀលថ្ងៃទី២៥ ខែមីនា ឆ្នាំ២០២៦ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបពិភាក្សាការងារជាមួយលោក គង់ នួន ប្រធានក្រុមប្រឹក្សាភិបាលក្រុមហ៊ុន Toyota Tsusho Manufacturing (Cambodia) Co., Ltd. និង លោក Kensuke Tsuchiya ប្រធានក្រុមហ៊ុន Toyota (Cambodia) Co., Ltd. នៅទីស្តីការក្រសួង។ ក្នុងឱកាសនោះ ឯកឧត្តមរដ្ឋមន្ត្រីក៏បានអញ្ជើញធ្វើជាសក្ខីភាព ក្នុងពិធីចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពី “ការបង្កើតមជ្ឈមណ្ឌលបណ្តុះបណ្តាល Toyota រួម” រវាងភាគីទាំងពីរ និង វិទ្យាស្ថានបច្ចេកទេស JVC។

អនុស្សរណៈនេះ មានគោលបំណងពង្រឹងសម្ព័ន្ធភាពរវាងវិស័យឧស្សាហកម្ម និងវិស័យអប់រំ ក្រោមគម្រោងសហប្រតិបត្តិការរដ្ឋ ឯកជន ដើម្បីលើកកម្ពស់គុណភាពបណ្ដុះបណ្ដាលបច្ចេកទេស និងវិជ្ជាជីវៈ លើជំនាញមេកានិចរថយន្តឲ្យសមស្របនឹងស្តង់ដារឧស្សាហកម្មទំនើប។ កិច្ចសហការនេះនឹងគាំទ្រដល់ការបង្កើតកម្មសិក្សា និងកម្មវិធីហាត់ការ ការបណ្តុះបណ្តាលគ្រូបង្រៀន ការកែលម្អកម្មវិធីសិក្សា ការផ្លាស់ប្តូរបច្ចេកវិទ្យា និងការជ្រើសរើសនិស្សិតចូលបម្រើការងារ។

ឯកឧត្តម ហេង សួរ បានវាយតម្លៃខ្ពស់ចំពោះការចូលរួមរបស់វិស័យឯកជន ក្នុងនាមជាដៃគូយុទ្ធសាស្ត្រសំខាន់ ក្នុងការអភិវឌ្ឍធនធានមនុស្សឱ្យមានជំនាញច្បាស់លាស់ និងផលិតភាពខ្ពស់ ស្របតាមតម្រូវការទីផ្សារការងារ។ ឯកឧត្តមបញ្ជាក់ថា ខណៈវិស័យឧស្សាហកម្មរថយន្តកំពុងរីកចម្រើនយ៉ាងឆាប់រហ័សនៅកម្ពុជា កិច្ចព្រមព្រៀងនេះនឹងក្លាយជាចលករសំខាន់ ក្នុងការបង្កើនឱកាសការងារ និងចំណូលសម្រាប់យុវជន។

ឯកឧត្តមបន្ថែមថា ការជ្រើសរើស វិទ្យាស្ថានបច្ចេកទេស JVC ជាដៃគូបណ្តុះបណ្តាល គឺជាជំហានសំខាន់មួយក្នុងការតភ្ជាប់ការអប់រំជាមួយតម្រូវការអនុវត្តន៍ពិតប្រាកដ និងបង្ហាញពីភាពជិតស្និទ្ធនៃកិច្ចសហប្រតិបត្តិការរវាងកម្ពុជា និងជប៉ុន។

ជាផ្នែកវិស័យឯកជន លោក គង់ នួន និង លោក Kensuke Tsuchiya បានថ្លែងអំណរគុណដល់ក្រសួងចំពោះការគាំទ្រដ៏សំខាន់ ដែលអនុញ្ញាតឲ្យមានកិច្ចសហការនេះកើតមានឡើង ហើយបានប្តេជ្ញាចិត្តបន្តចូលរួមអភិវឌ្ឍកម្លាំងពលកម្មជំនាញនៅកម្ពុជា ឲ្យកាន់តែមានគុណភាព និងប្រកួតប្រជែងបានក្នុងតំបន់។

ទោះជាយ៉ាងណា អ្នកជំនាញមើលឃើញថា ដើម្បីឲ្យគម្រោងនេះទទួលបានប្រសិទ្ធភាពខ្ពស់ ត្រូវការការតាមដានអនុវត្តជាក់ស្តែង ការវាស់វែងលទ្ធផល និងការធានាថា យុវជនទទួលបានជំនាញដែលអាចប្រើប្រាស់បានពិតប្រាកដនៅទីផ្សារការងារ។ ការបន្តពង្រឹងគុណភាពបណ្ដុះបណ្ដាល និងការភ្ជាប់ជាក់ស្តែងជាមួយឧស្សាហកម្ម នឹងជាចំណុចសំខាន់ក្នុងការបង្កើតផលប៉ះពាល់យូរអង្វែង៕