បង្ក្រាបក្តៅៗ! ទម្លាយទីតាំង Online Scam ក្នុងបុរីពិភពថ្មី ផ្សារដីហុយ ឃាត់ខ្លួនជនបរទេស៦នាក់

(ភ្នំពេញ)៖ កម្លាំងចម្រុះ នៃគណៈបញ្ជាការឯកភាពរដ្ឋបាលរាជធានីភ្នំពេញបានបើកប្រតិបត្តិការយ៉ាងតឹងរឹង ចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា (Online Scam) មួយកន្លែង នៅព្រឹកថ្ងៃទី២០ ខែមីនា ឆ្នាំ២០២៦ ស្ថិតក្នុងបុរីពិភពថ្មី ផ្សារដីហុយ សង្កាត់គោកឃ្លាង ខណ្ឌសែនសុខ រាជធានីភ្នំពេញ។

ប្រតិបត្តិការនេះ ធ្វើឡើងក្រោមការបញ្ជាដឹកនាំរបស់លោក ឃួង ស្រេង អភិបាលរាជធានីភ្នំពេញ និងលោកឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ ដោយអនុវត្តផ្ទាល់ដោយកម្លាំងជំនាញ និងមានការចូលរួមពីអាជ្ញាធរខណ្ឌសែនសុខ ព្រមទាំងសម្របសម្រួលនីតិវិធីច្បាប់ដោយលោក ថេង សំណាង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។

លទ្ធផលនៃការចុះបង្ក្រាបនេះ សមត្ថកិច្ចបានឃាត់ខ្លួនជនសង្ស័យជាជនជាតិបង់ក្លាដេសចំនួន ៦នាក់ ក្នុងនោះមានម្នាក់មិនមានលិខិតឆ្លងដែន។ ជាមួយគ្នានេះ ក៏បានរឹបអូសវត្ថុតាងរួមមាន កុំព្យូទ័រ All In One ចំនួន ១គ្រឿង និងទូរស័ព្ទដៃចំនួន ១៦គ្រឿង ដែលត្រូវបានប្រើប្រាស់សម្រាប់ប្រតិបត្តិការបោកប្រាស់។

តាមការសន្និដ្ឋានបឋមរបស់សមត្ថកិច្ចជំនាញ បានបញ្ជាក់ថា ក្រុមជនសង្ស័យបានប្រើប្រាស់បណ្តាញសង្គម Facebook Page ឈ្មោះ “BD service” និង “ক্ষুদ্র ঋন প্রকল্প” ដើម្បីផ្សព្វផ្សាយសេវាកម្ចីប្រាក់ក្លែងក្លាយ។ ពួកគេបានបន្លំអត្តសញ្ញាណខ្លួនជាបុគ្គលិកនៃ World Bank ហើយក្លែងបន្លំឯកសារផ្សេងៗ ដើម្បីបង្កើនភាពជឿទុកចិត្តពីជនរងគ្រោះ។ បន្ទាប់មក ទាមទារឲ្យបង់ “ប្រាក់សេវារត់ការ” ជាមុន សិន ទើបអនុម័តកម្ចី។ គោលដៅសំខាន់របស់ក្រុមនេះ គឺបោកប្រាស់ប្រជាពលរដ្ឋនៅប្រទេសបង់ក្លាដេស ខណៈប្រើប្រាស់ទឹកដីកម្ពុជាជាគោលដៅប្រតិបត្តិការ។

បច្ចុប្បន្ន ជនសង្ស័យ និងវត្ថុតាងទាំងអស់ ត្រូវបានប្រគល់ជូនសមត្ថកិច្ចជំនាញនៃស្នងការដ្ឋាននគរបាលរាជធានីភ្នំពេញ ដើម្បីអនុវត្តតាមនីតិវិធីច្បាប់ និងបន្តស្រាវជ្រាវកំណត់មុខសញ្ញាមេខ្លោងពាក់ព័ន្ធ។

ជាមួយគ្នានេះ អាជ្ញាធរបានអំពាវនាវដល់ម្ចាស់ផ្ទះជួលទាំងអស់ ឲ្យបង្កើនការប្រុងប្រយ័ត្នខ្ពស់ ចំពោះការអនុញ្ញាតឲ្យជនបរទេសស្នាក់នៅ ដោយត្រូវពិនិត្យឯកសារឲ្យបានត្រឹមត្រូវ និងរាយការណ៍ភ្លាមៗ ប្រសិនបើមានសកម្មភាពសង្ស័យពាក់ព័ន្ធនឹងបទល្មើសបច្ចេកវិទ្យា។

គួរបញ្ជាក់ថា សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្ដេជ្ញាចិត្តយ៉ាងម៉ឺងម៉ាត់ ក្នុងការបោសសម្អាតបទល្មើសឆបោកតាមប្រព័ន្ធបច្ចេកវិទ្យា ឲ្យអស់ពីកម្ពុជា នៅត្រឹមខែមេសា ឆ្នាំ២០២៦ ខាងមុខនេះ។ សម្តេចបានបញ្ជាក់ថា កម្ពុជា មិនមែនជាទីជម្រកសម្រាប់ឧក្រិដ្ឋជនបច្ចេកវិទ្យាឡើយ ហើយអ្នកណាក៏ដោយដែលពាក់ព័ន្ធ នឹងត្រូវប្រឈមមុខនឹងទោសទណ្ឌយ៉ាងតឹងរឹងបំផុត ដោយគ្មានការយោគយល់ឡើយ៕