លោក ស ថេត ប្រកាសតែងតាំងថ្នាក់ឧត្តមសេនីយ៍ថ្មី ពង្រឹងប្រសិទ្ធភាពប្រយុទ្ធប្រឆាំងបទល្មើស
(ភ្នំពេញ)៖ នៅរសៀលថ្ងៃទី២០ ខែមីនា ឆ្នាំ២០២៦នេះ លោក ស ថេត អគ្គស្នងការនគរបាលជាតិ តំណាងឲ្យលោក ស សុខា បានអញ្ជើញជាអធិបតីភាពក្នុងពិធីប្រកាសផ្ទេរភារកិច្ច និងតែងតាំងមុខតំណែងនាយនគរបាលថ្នាក់ឧត្តមសេនីយ៍នៃអគ្គស្នងការដ្ឋាននគរបាលជាតិ។
ពិធីដ៏មានសារៈសំខាន់នេះ បានប្រកាសឲ្យលោកឧត្តមសេនីយ៍ឯក សៀង សេន ចូលកាន់តំណែងជា «អគ្គស្នងការរងនគរបាលជាតិ» ខណៈលោកឧត្តមសេនីយ៍ត្រី សេន សុភាព ត្រូវបានតែងតាំងជា «ប្រធាននាយកដ្ឋានប្រឆាំងបទល្មើសល្បែងពាណិជ្ជកម្ម»។
គួរបញ្ជាក់ថា មុននឹងទទួលបានតួនាទីថ្មីនេះ លោក សេន សុភាព ធ្លាប់បម្រើការងារជាអនុប្រធាននាយកដ្ឋានសន្តិសុខផ្ទៃក្នុង នៃអគ្គស្នងការដ្ឋាននគរបាលជាតិ ដែលមានបទពិសោធន៍ និងសមត្ថភាពក្នុងការងារសន្តិសុខយ៉ាងលេចធ្លោ។
ការតែងតាំងថ្មីនេះ ត្រូវបានមើលឃើញថា ជាជំហានសំខាន់មួយក្នុងការពង្រឹងរចនាសម្ព័ន្ធដឹកនាំ និងលើកកម្ពស់ប្រសិទ្ធភាពការងាររបស់កម្លាំងនគរបាលជាតិ ក្នុងការថែរក្សាសន្តិសុខ សណ្តាប់ធ្នាប់សង្គម និងបង្ក្រាបបទល្មើសគ្រប់ប្រភេទឲ្យកាន់តែមានប្រសិទ្ធភាព៕
