ផ្ទុះហិង្សាដល់ស្លាប់! ជម្លោះដកបង្គោលព្រំដី ប្រែក្លាយជាអំពើបាញ់សម្លាប់ ខណៈនគរបាលសៀមរាបចាប់ខ្លួនជនដៃដល់បានភ្លាមៗ

(សៀមរាប)៖ ករណីហិង្សាដ៏រន្ធត់មួយ បានកើតឡើងពីជម្លោះតូចតាចរឿងដកបង្គោលព្រំដី ប៉ុន្តែបញ្ចប់ដោយការបាញ់សម្លាប់យ៉ាងឃោរឃៅ បណ្តាលឲ្យបុរសម្នាក់ស្លាប់ភ្លាមៗនៅកន្លែងកើតហេតុ ខណៈជនដៃដល់ត្រូវបានកម្លាំងនគរបាលតាមចាប់ខ្លួនបានក្នុងរយៈពេលខ្លីបំផុត។

ហេតុការណ៍នេះ បានកើតឡើងនៅវេលាម៉ោង ៨៖៤០នាទី ព្រឹកថ្ងៃទី២០ ខែមីនា ឆ្នាំ២០២៦ ត្រង់ចំណុចមុខផ្ទះជនរងគ្រោះ ក្បែររបងលើផ្លូវក្រាលគ្រួសក្រហម ស្ថិតក្នុងភូមិបិតផ្កា ឃុំស្វាយលើ ស្រុកស្វាយលើ។

តាមរបាយការណ៍របស់ស្នងការដ្ឋាននគរបាលខេត្តសៀមរាប បានឲ្យដឹងថា បន្ទាប់ពីទទួលបានសេចក្តីរាយការណ៍ភ្លាមៗ អំពីករណីបាញ់សម្លាប់ដោយប្រើកាំភ្លើងខ្លីម៉ាក K54 កម្លាំងជំនាញបានចុះអន្តរាគមន៍យ៉ាងឆាប់រហ័ស អនុវត្តតាមបទបញ្ជារបស់ ស ថេត និងក្រោមការយកចិត្តទុកដាក់ពី ប្រាក់ សោភ័ណ ព្រមទាំងការដឹកនាំផ្ទាល់របស់លោកឧត្តមសេនីយ៍ទោ ហួត សុធី ស្នងការនគរបាលខេត្ត។

កម្លាំងនគរបាលផែនការងារព្រហ្មទណ្ឌ សហការជាមួយអធិការដ្ឋាននគរបាលស្រុកស្វាយលើ បានចុះដល់កន្លែងកើតហេតុ បើកការស្រាវជ្រាវយ៉ាងម៉ឺងម៉ាត់ រហូតអាចកំណត់អត្តសញ្ញាណ និងតាមចាប់ខ្លួនជនសង្ស័យបានភ្លាមៗ។

របាយការណ៍បញ្ជាក់ថា ជនរងគ្រោះឈ្មោះ អ៊ុត ថៃ អាយុ៥៥ឆ្នាំ មុខរបរកសិករ ត្រូវបានជនដៃដល់បាញ់ចំនួន៤គ្រាប់ បណ្តាលឲ្យស្លាប់ភ្លាមៗនៅកន្លែងកើតហេតុ។ បន្ទាប់ពីធ្វើសកម្មភាពហើយ ជនដៃដល់បានរត់គេចខ្លួនចូលព្រៃ ដោយមានកាំភ្លើងជាប់ខ្លួន។

ទោះយ៉ាងណា កម្លាំងនគរបាលបានដេញតាមយ៉ាងជិតស្និទ្ធ រហូតដល់ចំណុចក្បែររីសតធីសាក់ ជាប់ជើងភ្នំគូលែន ហើយអាចចាប់ខ្លួនបាននៅវេលាម៉ោង ៩៖៤០នាទី ថ្ងៃដដែល ដែលមានចម្ងាយប្រមាណជិត២គីឡូម៉ែត្រពីកន្លែងកើតហេតុ។

ជនសង្ស័យមានឈ្មោះ ញឹក ម៉ៅ អាយុ៥៣ឆ្នាំ មុខរបរកសិករ មានស្រុកកំណើតនៅខេត្តបាត់ដំបង និងបច្ចុប្បន្នរស់នៅឃុំស្វាយលើ ស្រុកស្វាយលើ។ ក្នុងប្រតិបត្តិការ នគរបាលបានដកហូតកាំភ្លើងខ្លីម៉ាក K54 មួយដើម មានបង់២ និងគ្រាប់សរុប១៦គ្រាប់។

បច្ចុប្បន្ន ជនដៃដល់ត្រូវបានសមត្ថកិច្ចកំពុងសាកសួរតាមនីតិវិធី និងកសាងសំណុំរឿងបញ្ជូនទៅតុលាការ ដើម្បីចាត់ការតាមផ្លូវច្បាប់ ខណៈមូលហេតុដើមបណ្តាលមកពីជម្លោះព្រំដី បន្តជាការព្រមានដល់សង្គមថា ជម្លោះតូចមួយ អាចនាំឲ្យបង្កើតអំពើហិង្សាដ៏ធ្ងន់ធ្ងរបាន៕