ទើបចេញពន្ធនាគារ មិនរាងចាល! បុរសញៀនថ្នាំលួចកាត់ចេក ត្រូវសមត្ថកិច្ចឃាត់ខ្លួនភ្លាមៗ

(កណ្តាល)៖ បុរសជាមុខសញ្ញាញៀនថ្នាំម្នាក់ ដែលទើបនឹងចេញពីពន្ធនាគារ ត្រូវបានកម្លាំងនគរបាលស្រុកកណ្តាលស្ទឹង ឃាត់ខ្លួនភ្លាមៗ ខណៈកំពុងលីផ្លែចេកខ្ចី ១ស្ទោង ដែលលួចកាត់បំណងយកទៅលក់ នៅវេលាម៉ោង ២៣និង០៥នាទីយប់ ថ្ងៃទី១៨ ខែមីនា ឆ្នាំ២០២៦ ស្ថិតនៅភូមិព្រៃតាតូច ឃុំបឹងខ្យាង។

សមត្ថកិច្ចបានឲ្យដឹងថា ជនសង្ស័យឈ្មោះ សុន ជីវ័ន្ត អាយុ ២៧ឆ្នាំ មុខរបរមិនពិតប្រាកដ និងមានសារធាតុញៀនក្នុងទឹកនោមវិជ្ជមាន។ ក្រោយឃាត់ខ្លួន សមត្ថកិច្ចបានដកហូតវត្ថុតាងរួមមាន ផ្លែចេកខ្ចី ១ស្ទោង និងកាំបិតកញ្ចែត ១ដើម ដែលប្រើសម្រាប់ធ្វើសកម្មភាព។

តាមប្រភពដដែល បុរសរូបនេះបានទៅជក់គ្រឿងញៀនជាមួយបក្ខពួកម្នាក់ មុននឹងកើតគំនិតលួចកាត់ផ្លែចេកពីដីឡូត៍ទំនេរ ហើយព្យាយាមយកទៅលក់ តែត្រូវសមត្ថកិច្ចប្រទះឃើញកំពុងល្បាត និងឃាត់ខ្លួនបានភ្លាមៗ។

សមត្ថកិច្ចបញ្ជាក់ថា ជនសង្ស័យធ្លាប់ប្រព្រឹត្តសកម្មភាពដូចគ្នានេះមកហើយ និងទើបចេញពីពន្ធនាគារពាក់ព័ន្ធនឹងករណីគ្រឿងញៀន។ បច្ចុប្បន្ន ត្រូវបានឃាត់ខ្លួនដើម្បីកសាងសំណុំរឿង ចាត់ការតាមនីតិវិធីច្បាប់៕