លោកស្នងការ ឈឿន សុចិត្ត បង្ហាញការគាំទ្រពេញទំហឹង អញ្ជើញចូលរួមកិច្ចប្រជុំជាតិដើម្បីស្ត្រី កំណត់ទិសដៅអភិវឌ្ឍថ្មី ក្រោមអធិបតីភាពឧបនាយករដ្ឋមន្ត្រី នេត្រ សាវឿន!

(ភ្នំពេញ)៖ នៅព្រឹកថ្ងៃសុក្រ ទី២០ ខែមីនា ឆ្នាំ២០២៦ កិច្ចប្រជុំដ៏សំខាន់មួយស្តីពីការបូកសរុបលទ្ធផលការងារឆ្នាំ២០២៥ និងលើកទិសដៅសកម្មភាពការងារឆ្នាំ២០២៦ របស់ក្រុមប្រឹក្សាជាតិកម្ពុជា ដើម្បីស្ត្រី ត្រូវបានរៀបចំឡើងយ៉ាងអធិកអធម នៅសាលប្រជុំរំដួល វិមានសន្តិភាព នៃទីស្តីការគណៈរដ្ឋមន្ត្រី។

ក្នុងឱកាសដ៏មានសារៈសំខាន់នេះ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញចូលរួមជាមួយនឹងថ្នាក់ដឹកនាំ និងមន្ត្រីពាក់ព័ន្ធជាច្រើន ដើម្បីពិនិត្យវាយតម្លៃលទ្ធផលការងារកន្លងមក និងពិភាក្សាលើគោលនយោបាយថ្មីៗ សំដៅលើកកម្ពស់សិទ្ធិស្ត្រី និងសមភាពយេនឌ័រ នៅក្នុងសង្គមកម្ពុជា។

កិច្ចប្រជុំខាងលើ ប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ឯកឧត្ដម នេត សាវឿន ឧបនាយករដ្ឋមន្ត្រី ជាតំណាងដ៏ខ្ពង់ខ្ពស់របស់សម្ដេចមហាបររធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានបង្ហាញពីការយកចិត្តទុកដាក់យ៉ាងខ្ពស់របស់រាជរដ្ឋាភិបាល ចំពោះការលើកកម្ពស់ស្ថានភាពស្ត្រី និងការចូលរួមសកម្មរបស់ស្ត្រីក្នុងគ្រប់វិស័យ។

តាមរយៈកិច្ចប្រជុំនេះ ក៏បានរំលេចយ៉ាងច្បាស់ពីសមិទ្ធផលជាច្រើនដែលសម្រេចបានក្នុងឆ្នាំ២០២៥ ក៏ដូចជាការកំណត់ទិសដៅសកម្មភាពថ្មីៗ សម្រាប់ឆ្នាំ២០២៦ ដោយផ្តោតលើការការពារសិទ្ធិស្ត្រី ការកាត់បន្ថយអំពើហិង្សា និងការពង្រឹងសមត្ថភាពស្ត្រីឱ្យកាន់តែមានភាពរឹងមាំ និងសមត្ថភាពចូលរួមក្នុងការអភិវឌ្ឍជាតិ។

វត្តមានរបស់លោកឧត្តមសេនីយ៍ទោ ឈឿន សុចិត្ត ក្នុងកិច្ចប្រជុំដ៏មានន័យនេះ បានបង្ហាញពីការគាំទ្រយ៉ាងពេញទំហឹងរបស់កងកម្លាំងនគរបាលខេត្តកណ្តាល ក្នុងការអនុវត្តគោលនយោបាយរបស់រាជរដ្ឋាភិបាល និងការចូលរួមចំណែកក្នុងការកសាងសង្គមមានសមភាព យុត្តិធម៌ និងសុវត្ថិភាពសម្រាប់ស្ត្រី និងប្រជាពលរដ្ឋទាំងមូល៕