កក្រើកពិភពលោក, មហារឿងអាស្រូវរំលោភបំពានផ្លូវភេទរបស់ Epstein កំពុងកក្រើកពិភពលោក! តើមេដឹកនាំពិភពលោក មហាសេដ្ឋីកំពូលៗណាខ្លះមានឈ្មោះក្នុងឯកសារ Epstein ថ្មីចុងក្រោយបំផុត?

(វ៉ាស៊ីនតោន)៖ ក្រសួងយុត្តិធម៌អាមេរិកកាលពីថ្ងៃសុក្រសប្ដាហ៍មុនបានបញ្ចេញឯកសារថ្មីចុងក្រោយបំផុតមួយបាច់ធំនៃសំណុំរឿងអាស្រូវផ្លូវភេទ Jeffrey Epstein ដែលក្នុងនោះមានឯកសារជាច្រើន ៣លានទំព័រ ព្រមទាំងវីដេអូ និងរូបភាពរាប់ម៉ឺន។ ការបញ្ចេញឯកសារទាំងនោះបានធ្វើឱ្យពិភពលោកមានការភ្ញាក់ផ្អើលយ៉ាងខ្លាំង ដ្បិតឈ្មោះបុគ្គលល្បីៗ និងមានអំណាចជាច្រើននាក់មានឈ្មោះនៅក្នុង បញ្ជីនៃសំណុំរឿងអាស្រូវផ្លូវភេទ Jeffrey Epstein។

លោក Jeffrey Epstein គឺជាមហាសេដ្ឋី​អាមេរិក​​​ម្នាក់ជាប់ចោទ​ពីបទរំលោភ​បំពាន​ផ្លូវភេទ​លើស្ត្រី​។ ស្ត្រីជាជនរងគ្រោះជាច្រើននាក់ មានខ្លះអាយុ១៤ឆ្នាំ បានដាក់ពាក្យប្ដឹងប្រឆាំងលោក Epstein ថាបានរំលោភបំពានផ្លូវភេទ និងកេងប្រវ័ញ្ចផ្លូវភេទ ហើយថាលោកជាមនុស្សល្មោភកាមបំផុត។ លោក Epstein ត្រូវបានគេប្រទះឃើញស្លាប់ដោយចងក នៅក្នុងបន្ទប់ឃុំឃាំងកាលពីឆ្នាំ២០១៩។ ប្រភពពី​មន្ទីរឃុំឃាំងបានបញ្ជាក់ថាគឺការស្លាប់នេះទំនងជាការធ្វើអត្តឃាត។ ប៉ុន្តែចាប់តាំងពីពេលនោះមក ក៏មានការសង្ស័យដែរថាលោកអាចត្រូវបានគេសម្លាប់បំបិទមាត់ ដោយសារតែមានជាប់ពាក់ព័ន្ធ នឹងមនុស្សមានអំណាចធំៗ។

កាលនៅរស់ លោក Epstein ជាមនុស្សចូលចិត្តរាប់អានមនុស្សល្បីៗ រួមទាំងអ្នកមានអំណាច និងអ្នកនយោបាយធំៗនៅសហរដ្ឋអាមេរិក ក្នុងនោះរួមមានលោក ត្រាំ និងលោក ប៊ីល គ្លីនតុន ជាដើម។ រដ្ឋបាលលោក ត្រាំ កំពុងប្រឈមមុខនឹងសម្ពាធឱ្យបញ្ចេញឯកសារនៃសំណុំរឿងរបស់លោក Jeffrey Epstein ខណៈមានការលើកឡើងជាច្រើនថាក្រុមមនុស្សជំនិត និងអ្នកគាំទ្ររបស់លោក ត្រាំ កំពុងព្យាយាមបិទបាំងទំនាក់ទំនងរបស់លោក Epstein ជាមួយពួកអ្នកមានលុយ និងមានអំណាចនៅអាមេរិក។ លោក ត្រាំ ដែលធ្លាប់ថតរូបជាមួយលោក Epstein ជាច្រើនលើកក្នុងទសវត្សរ៍ ឆ្នាំ១៩៩០ និង២០០០ បានប្រាប់ក្រុមអ្នកសារព័ត៌មានក្នុងឆ្នាំ២០១៩ ថាលោកបានកាត់ផ្ដាច់ទំនាក់ទំនងជាមួយលោក Epstein តែតាំងពីមុនមានរឿងក្ដីក្ដាំប្រឆាំងលោក Epstein។

ខាងក្រោមនេះគឺជាបញ្ជីឈ្មោះបុគ្គលមានអំណាច និងល្បីៗដែលមានឈ្មោះក្នុងសំណុំរឿង Jeffrey Epstein៖

* ប្រធានាធិបតីអាមេរិក លោក ដូណាល់ ត្រាំ
លោក ដូណាល់ ត្រាំ ត្រូវបានលើកឡើងជាច្រើនរយដងនៅក្នុងឯកសារថ្មីចុងក្រោយបំផុតបញ្ចេញដោយក្រសួងយុត្តិធម៌អាមេរិក។ ប៉ុន្តែលោក ត្រាំ បានច្រានចោលរាល់ការចោទប្រកាន់ប្រឆាំងនឹងរូបលោក ពីការប្រព្រឹត្តខុសច្បាប់នៅក្នុងទំនាក់ទំនងជាមួយលោក Epstein។ លោកក៏បានអះអាងដែរថារូបលោកបានកាត់ផ្ដាច់ទំនាក់ទំនងជាមួយលោក Epstein អស់ជាច្រើនទសវត្សរ៍ ហើយរូបលោកក៏មិន ដែលត្រូវបានចោទប្រកាន់ពីការប្រព្រឹត្តបទឧក្រិដ្ឋណាមួយដោយជនរងគ្រោះរបស់លោក Epstein នោះដែរ។

* លោក Elon Musk
លោក Elon Musk កំពូលមហាសេដ្ឋីអាមេរិក និងជាស្ថាបនិកក្រុមហ៊ុន Tesla ក៏មានឈ្មោះនៅក្នុងឯកសារ Epstein ផងដែរជាពិសេសការឆ្លើយឆ្លងសារ Emails នៅចន្លោះពីឆ្នាំ២០១២ ដល់ឆ្នាំ២០១៣ ដែលអ្នកទាំង២បានជជែកគ្នាពីទស្សនកិច្ចទៅកាន់កោះឯកជនរបស់លោក Epstein។ តែភ្លាមៗ គេមិនទាន់ដឹងច្បាស់ថាតើលោក Elon Musk ពិតជាបានធ្វើដំណើរទៅកាន់កោះឯកជន របស់លោក Epstein ឬយ៉ាងណានោះទេ?

* លោក Bill Gates
សារ Email ចំនួន២ចុះកាលបរិច្ឆេទឆ្នាំ២០១៣ ហាក់ដូចជាត្រូវបានសរសេរដោយលោក Epstein ប៉ុន្តែវាមិនច្បាស់ថាតើសារទាំង២នោះជាសារពិតប្រាកដ ឬក៏ថាតើត្រូវបានបញ្ជូនទៅឱ្យមហាសេដ្ឋី និងសហស្ថាបនិកក្រុមហ៊ុន Microsoft លោក Bill Gates ឬក៏យ៉ាងណានោះទេ? ក្នុងសារ Email ដដែលនោះ លោក Epstein បាននិយាយពីលោក Bill Gates ថាមហាសេដ្ឋីរូបនេះ មានទំនាក់ទំនងផ្លូវភេទក្រៅអាពាហ៍ពិពាហ៍។ បន្ថែមពីលើនេះ ក្នុងសារ​ Email មួយ លោក Epstein បានសរសេរថារូបលោកបានជួយលោក Bill Gates ទិញថ្នាំព្យាបាលជំងឺបន្ទាប់ពីរួមភេទជាមួយ នារីជាជនជាតិរុស្ស៉ីជាច្រើននាក់ ព្រមទាំងបានជួយសម្រួលឱ្យលោក Bill Gates ណាត់ជួបជាមួយស្ត្រីម្នាក់រៀបការរួចហើយទៀតផង។ តែតំណាងម្នាក់របស់លោក Bill Gates បានចាត់ទុកការចោទប្រកាន់នេះជារឿងមិនពិតទាំងស្រុង។

* លោក Bill Clinton
ដូចគ្នាទៅនឹងលោក ត្រាំ លោក Bill Clinton អតីតប្រធានាធិបតីអាមេរិក បានចំណាយពេលរាប់អានជាមួយលោក Epstein ជាង២ទសវត្សរ៍ ក្នុងនោះរួមមានការធ្វើដំណើរតាមយន្ដហោះឯកជនរបស់ លោក Epstein និងជួបគ្នានៅឯសេតវិមាន។ លោក Clinton បានបដិសេធទទួលស្គាល់ពីកំហុសណាមួយរបស់លោក Epstein ខណៈអ្ន្កកតំណាងរបស់អតីតប្រធានាធិបតីអាមេរិករូបនេះ បានអះអាងថាលោក Clinton បានផ្ដាច់ទំនាក់ទំនងជាមួយលោក Epstein ក្រោយការចោទប្រកាន់ព្រហ្មទណ្ឌជុំដំបូងក្នុងឆ្នាំ២០០៦។

* អតីតព្រះអង្គម្ចាស់ Andrew Mountbatten-Windsor
រូបភាពជាច្រើនសន្លឹកបានបង្ហាញថាអតីតព្រះអង្គម្ចាស់ Andrew បានលុតជង្គង់យកដៃស្ទាបពោះស្ត្រីម្នាក់កំពុងដេកនៅលើឥដ្ឋ។ ករណីរបស់អតីតព្រះអង្គម្ចាស់អង់គ្លេសអង្គនេះមានលក្ខខណៈធ្ងន់ៗធ្ងរ ជាងគេដោយសារមានរូបភាពច្បាស់ៗ។

* លោក Richard Branson
ឈ្មោះរបស់មហាសេដ្ឋីអង់គ្លេស និងជាថៅកែក្រុមហ៊ុន Virgin Group លោក Richard Branson ត្រូវបានលើកឡើងជាច្រើនរយដងនៅក្នុងឯកសារ Jeffrey Epstein ថ្មីចុងក្រោយបំផុត។ នៅក្នុងការសន្ទនាកាលពីឆ្នាំ២០១៣ លោក Epstein បានអរគុណលោក Branson សម្រាប់ការទទួលបដិសណ្ឋារកិច្ចរូបលោក។

* លោកស្រី Sarah Ferguson
លោកស្រី Sarah Ferguson ជាអតីតភរិយារបស់អតីតព្រះអង្គម្ចាស់ Andrew Mountbatten-Windsor ត្រូវបានលើកឈ្មោះជាច្រើនដងនៅក្នុងសារ Emails ជាច្រើនផងដែរ ក្នុងនោះរួមមានទាំងនៅអំឡុងពេលលោក Epstein កំពុងជាប់ឃុំនៅក្នុងផ្ទះ។

* លោក Lord Mandelson
លោក Epstein បានផ្ទេរប្រាក់ ៧៥០០០ដុល្លារចូលទៅក្នុងកុងធនាគារដែលមានជាប់ពាក់ព័ន្ធនឹងលោក Lord Mandelson ជាសមាជិកសភាជាន់ខ្ពស់របស់ចក្រភពអង់គ្លេស។ ប៉ូលិសអង់គ្លេសបានបើក ការស៊ើបអង្កេតមួយលើលោក Lord Mandelson បន្ទាប់ពីមានការអះអាងថាលោកបានបញ្ជូនឯកសារទីផ្សារដ៏រសើបទៅឱ្យលោក Epstein។

* លោក Steve Bannon
ឯកសារថ្មីចុងក្រោយបំផុតបញ្ចេញដោយក្រសួងយុត្តិធម៌អាមេរិកបានបង្ហាញពីសារចំនួនរាប់ពាន់ដែលត្រូវបានបញ្ជូនឆ្លើយឆ្លងគ្នារវាងលោក Epstein និងអតីតទីប្រឹក្សាជំនិតម្នាក់របស់លោក ត្រាំ គឺលោក Steve Bannon។ ភាគច្រើននៃសារទាំងនោះត្រូវបានផ្ញើនៅចន្លោះពីឆ្នាំ២០១៨ ដល់ឆ្នាំ២០១៩ បន្ទាប់ពីលោក Bannon លាលែងចេញពីតំណែងក្នុងអាណត្តិទី១របស់លោក ត្រាំ។ ក្នុងសារឆ្លើយឆ្លងមួយ លោក Bannon ទំនងជាណែនាំលោក Epstein ពីរបៀបលាងខ្លួន ដោយនិយាយថា «ដំបូង យើងត្រូវប្រកែកនឹងការចោទប្រកាន់ និងសាងកេរ្ត៍ឈ្មោះឡើងវិញតាមរយៈការដើរតួនាទីជាជនសប្បុរស»។

* លោក Miroslav Lajcak
នៅក្នុងសារឆ្លើយឆ្លងមួយកាលពីខែតុលា ឆ្នាំ២០១៨ រវាងលោក Miroslav Lajcak ដែលធ្លាប់បម្រើការជារដ្ឋមន្ត្រីការបរទេសស្លូវ៉ាគីនៅពេលនោះ និងលោក Epstein ហាក់បង្ហាញថាអ្នកទាំង២ បានជជែកគ្នាអំពីមនុស្សស្រី និងការទូត។ លោក Miroslav Lajcak ជាទីប្រឹក្សាសន្តិសុខជាតិរបស់នាយករដ្ឋមន្ត្រីស្លូវ៉ាគី បានលាលែងចេញពីតំណែងកាលពីថ្ងៃសៅរ៍សប្ដាហ៍មុន បន្ទាប់ពី ទំនាក់ទំនងកាលពីអតីតកាលរបស់លោកជាមួយលោក Epstein មាននៅក្នុងឯកសារថ្មីចុងក្រោយបំផុតដែលត្រូវបានចេញផ្សាយកាលពីថ្ងៃសុក្រសប្ដាហ៍មុន។

* លោក Howard Lutnick
ជាមហាសេដ្ឋីម្នាក់ និងជារដ្ឋមន្ត្រីក្រសួងពាណិជ្ជកម្មអាមេរិកផងនោះ លោក Howard Lutnick ធ្លាប់មានគម្រោងធ្វើដំណើរទស្សនកិច្ចទៅកាន់កោះ Little Saint James របស់លោក Jeffrey Epstein ជាមួយក្រុមគ្រួសាររបស់លោក។ នេះបើតាមសារ Emails ជាច្រើនដែលមាននៅក្នុងឯកសារថ្មីចុងក្រោយបំផុតនៃសំណុំរឿងអាស្រូវផ្លូវភេទ Epstein។ ខាងក្រសួងពាណិជ្ជកម្មអាមេរិក បាននិយាយក្នុងសេចក្ដីថ្លែងការណ៍មួយថាទំនាក់ទំនងរបស់លោក Lutnick ជាមួយលោក Epstein មានព្រំដែនកំណត់ នៅក្រោមវត្តមានភរិយារបស់លោក Lutnick ហើយលោកក៏មិនដែលត្រូវបាន ចោទប្រកាន់ថាបានប្រព្រឹត្តកំហុសអ្វីដែរ។

* លោក Larry Summers
លោក Larry Summers ជាអតីតរដ្ឋមន្ត្រីក្រសួងហិរញ្ញវត្ថុរបស់អតីតប្រធានាធិបតីអាមេរិក លោក Bill Clinton និងជាអតីតសាលវិទ្យាធិការនៃសាកលវិទ្យាល័យ Harvard University ក៏មានឈ្មោះ នៅក្នុងឯកសារ Epstein ថ្មីចុងក្រោយបំផុតផងដែរ ក្នុងនោះរួមមានទាំងការទំនាក់ទំនងតាមរយៈការជួបគ្នា និងហូបអាហារពេលល្ងាចរវាងលោក Summers និងលោក Epstein។ ក្នុងសារ Emails កាលពីឆ្នាំ២០១៧ លោក Summers និងលោក Epstein បាននិយាយលេងសើចអំពីលោក ត្រាំ និងរិះគន់ប្រធានាធិបតីអាមេរិកអំឡុងអាណត្តិទី១របស់លោក។

* លោក Steve Tisch
លោក Steve Tisch ជាសហស្ថាបនិកក្លឹបបាល់ទាត់ New York Giants មានឈ្មោះនៅក្នុងឯកសារ Epstein ដោយគេបានបរិយាយពីស្ត្រីម្នាក់ដែលលោកបានជួបនៅឯផ្ទះរបស់លោក Epstein។ នៅក្នុងការឆ្លើយឆ្លងសារ Email មួយ លោក Tisch បានសួរថាតើស្ត្រីម្នាក់នោះជាអ្នកប្រកបអាជីពអ្វី ឬក៏ជាមនុស្សធម្មតា។ ក្នុងការឆ្លើយឆ្លងនោះដែរ លោក Epstein បានប្រាប់លោក Tisch ថា លោកមានអំណោយឱ្យរូបលោក និងបានបរិយាយពីស្ត្រីម្នាក់ដែលលោកនឹងណែនាំឱ្យលោក Tisch ស្គាល់មានភាពទាក់ទាញបំផុត។

* លោក Brett Ratner
អ្នកដឹកនាំថតភាពយន្ដឯកសាររបស់ជំទាវទី១អាមេរិក លោកស្រី Melania Trump ក៏មានឈ្មោះនៅក្នុងឯកសារ Epstein ថ្មីចុងក្រោយបំផុតផងដែរ ហើយថែមទាំងមានរូបភាពឱបស្ត្រីវ័យក្មេងម្នាក់ ទៀតផង។

* លោក Sergey Brin
លោក Sergey Brin ជាសហស្ថាបនិក Google បានធ្វើទស្សនកិច្ចទៅកាន់កោះឯកជនរបស់លោក Epstein ហើយមានគម្រោងហូបបាយពេលល្ងាចនៅឯផ្ទះរបស់លោក Epstein ក្នុងទីក្រុង New York។ នេះបើតាមឯកសារត្រូវបានចេញកាលពីថ្ងៃសុក្រសប្ដាហ៍មុន។

*​ លោក Ehud Barak
អតីតនាយករដ្ឋមន្ត្រីអ៉ីស្រាអែល លោក Ehud Barak ត្រូវបានលើកឈ្មោះនៅក្នុងឯកសារ Epstein ថ្មីចុងក្រោយបំផុត។ ឯកសារថ្មីនេះបានបង្ហាញថាអ្នកទាំង២បានទាក់ទងគ្នាជាច្រើនដង ក្រោយលោក Epstein ត្រូវបានកាត់ទោសឱ្យជាប់ពិរុទ្ធពីឧក្រិដ្ឋកម្មផ្លូវភេទក្នុងរដ្ឋ Florida នៅឆ្នាំ២០០៨។ សារឆ្លើយឆ្លងមួយបានបង្ហាញថាលោក Barak មានគម្រោងស្នាក់នៅផ្ទះរបស់លោក Epstein ក្នុងទីក្រុង New York កាលពីឆ្នាំ២០១៧៕