តុលាការនៅប្រទេសកូរ៉េខាងត្បូងបានផ្តន្ទាទោសលោកស្រី Kim Keon Hee អតីតភរិយាអតីតប្រធានាធិបតីឱ្យជាប់ពន្ធនាគាររយៈពេល១ឆ្នាំនិង៨ខែ

(សេអ៊ូល)៖ នាថ្ងៃពុធនេះ តុលាការនៅប្រទេសកូរ៉េខាងត្បូង បានផ្តន្ទាទោសលោកស្រី Kim Keon Hee ដែលត្រូវជាភរិយារបស់​អតីតប្រធានាធិបតីលោក Yoon Suk Yeol ឱ្យជាប់ពន្ធនាគាររយៈពេល១ឆ្នាំនិង៨ខែ បន្ទាប់ពីរកឃើញថា លោកស្រីមានពិរុទ្ធ​ក្រោមបទចោទប្រកាន់ទទួលសំណូកជាសម្ភារមានតម្លៃ ពីក្រុមសាសនា Unification Church។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី២៨ ខែមករា ឆ្នាំ២០២៦។

យ៉ាងណាមិញ តុលាការបានសម្រេចឱ្យលោកស្រីរួចផុតពីការចោទប្រកាន់ ២ផ្សេងទៀត គឺពីបទបោកបញ្ឆោតតម្លៃភាគហ៊ុន និងបំពានច្បាប់​ស្តីពីមូលនិធិនយោបាយ។ សេចក្តីសម្រេចនេះ អាចត្រូវប្តឹងឧទ្ធរណ៍ដោយលោកស្រី Kim ផ្ទាល់ ឬដោយរដ្ឋអាជ្ញា។ កន្លងមក ខាងរដ្ឋអាជ្ញាបានទាមទារឱ្យតុលាការកាត់ទោសដាក់ពន្ធនាគារលោកស្រី រយៈពេលរហូតដល់១៥ឆ្នាំ និងពិន័យជាប្រាក់២.៩ពាន់លានវ៉ុន ឬស្មើ២លានដុល្លារអាមេរិក ជុំវិញការចោទប្រកាន់ទាំងប៉ុន្មានខាងលើ។

ស្វាមីលោកស្រី គឺអតីតប្រធានាធិបតី Yoon ត្រូវបានសភាកូរ៉េខាងត្បូង ទម្លាក់ចេញពីអំណាចកាលខែមេសា ពីឆ្នាំ២០២៥ ដោយសារតែការប្រកាសដាក់​ប្រទេសក្រោមច្បាប់អាជ្ញាសឹក នៅចុងឆ្នាំ២០២៤។ ចាប់តាំងពីពេលនោះ ប្តីប្រពន្ធដែលធ្លាប់មានឥទ្ធិពលមួយគូនេះ ត្រូវបានអាជ្ញាធរចាប់ឃុំខ្លួន និងប្រឈមសំណុំរឿងជាច្រើន។

គួរបញ្ជាក់ថា ​សម្រាប់លោក Yoon រូបលោកប្រឈមនឹងសំណុំរឿងក្តីក្តាំងសរុបចំនួន៨ ​ក្នុងនោះរួមមានទាំងបទចោទប្រកាន់បះបោរ ដែលរដ្ឋអាជ្ញាបានស្នើឱ្យប្រហារជីវិតរូបលោក។ កាលពីពេលថ្មីៗនេះ លោក Yoon បានប្តឹងជំទាស់ចំពោះសាលក្រមជាប់ពន្ធនាគារ៥ឆ្នាំ ពាក់ព័ន្ធបទចោទប្រកាន់ព្យាយាមរារាំងមិនឱ្យប៉ូលិសចាប់ខ្លួន ក្រោយប្រកាសច្បាប់អាជ្ញាសឹក៕