សហរដ្ឋអាមេរិកប្រកាសអាសន្នព្រោះព្យុះរដូវរងាដ៏ធំគ្របដណ្តប់លើសហរដ្ឋរដ្ឋយ៉ាងហោចចំនួន១៦ ទាំងរដ្ឋធានីវ៉ាស៉ីនតោន!
(វ៉ាស៉ីនតោន)៖ នៅថ្ងៃសៅរ៍ ទី២៤ ខែមករា ឆ្នាំ២០២៦នេះ ព្យុះរដូវរងាដ៏ធំសម្បើមមួយបានបង្កនូវការធ្លាក់ព្រិលក៏ដូចជាភ្លៀងទឹកកកនៅរដ្ឋ New Mexico និងរដ្ឋ Texas ស្របពេលដែលវាគ្របដណ្តប់លើសហរដ្ឋអាមេរិក នាំឱ្យប្រជាជនអាមេរិករាប់លាននាក់ ប្រឈមការដាច់ចរន្តអគ្គិសនី ភាពច្របូលច្របល់នៃមធ្យោបាយដឹកជញ្ជូន និងអាកាសធាតុត្រជាក់ខ្លាំង។ នេះបើតាមការចេញផ្សាយ ដោយទីភ្នាក់ងារព័ត៌មាន AFP។
រដ្ឋមន្រ្តីក្រសួងដឹកជញ្ជូនអាមេរិកបានព្រមានថា ប្រជាជនអាមេរិកដល់២៤០លាននាក់ អាចរងផលប៉ះពាល់ដោយសារព្យុះរដូវរងាឈ្មោះថា Fern ខណៈរដ្ឋយ៉ាងហោចចំនួន១៦ និងរដ្ឋធានីវ៉ាស៉ីនតោន បាននាំគ្នាប្រកាសភាពអាសន្ន។ ទីភ្នាក់ងារជាតិឧតុនិយមអាមេរិក បានទទូចឱ្យមានការប្រុងប្រយ័ត្នខ្ពស់ ចំពោះព្យុះរដូវរងាមួយនេះ ហើយបានព្យាករថា នឹងមានព្រិលធ្លាក់យ៉ាងក្រាស់ចាប់តាំងពីរដ្ឋ New Mexico រហូតដល់រដ្ឋ Maine។
គួរបញ្ជាក់ថា សម្រាប់ថ្ងៃសៅរ៍និងថ្ងៃអាទិត្យ ជើងហោះហើរសរុបប្រហែល១៣ ០០០ជើង ត្រូវបានលុបចោលនៅទូទាំងសហរដ្ឋអាមេរិក ហើយគិតត្រឹមថ្ងៃសៅរ៍ មនុស្សប្រហែលជិត១៣០ ០០០នាក់ គ្មានអគ្គិសនីប្រើប្រាស់។ នៅទីក្រុង Dallas ដែលជាទូទៅទទួលរងអាកាសធាតុមិនសូវត្រជាក់ខ្លាំងប៉ុន្មានឡើយនោះ បានមើលឃើញសីតុណ្ហភាពធ្លាក់ដល់ ដក៦អង្សាសេ។ អាជ្ញាធរបានព្រមានអំពីអាកាសធាតុចុះត្រជាក់ខ្លាំង ដែលគំរាមកំហែងដល់អាយុជីវិត អាចបន្តច្រើនសប្តាហ៍ ជាពិសេសនៅតំបន់ Northern Plains និង Upper Midwest៕
