ត្រីឆ្លាមខាំក្មេងប្រុសម្នាក់រហូតដល់ស្លាប់ នៅកំពង់ផែទីក្រុងស៉ីដនី នៅអូស្ត្រាលី

(ស៉ីដនី)៖ ក្មេងប្រុសជនជាតិអូស្ត្រាលីម្នាក់ អាយុ ១២ឆ្នាំបានស្លាប់នៅមន្ទីរពេទ្យ បន្ទាប់ពីត្រូវត្រីឆ្លាមខាំឱ្យរបួសនៅឯកំពង់ផែទីក្រុងស៉ីដនី ដោយគ្រួសាររបស់ក្មេងប្រុសរូបនេះបានចេញមកបញ្ជាក់ ខណៈដែលហេតុការណ៍ត្រីឆ្លាមខាំត្រូវបានគេរាយការណ៍ជាបន្ត នៅតាមឆ្នេរសមុទ្រភាគខាងកើតប្រទេសអូស្រ្តាលី។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃសៅរ៍ ថ្ងៃទី២៤ ខែមករា ឆ្នាំ ២០២៦។

ក្មេងប្រុសនេះឈ្មោះ Nico Antic ត្រូវបានត្រីឆ្លាមខាំតាំងពីថ្ងៃអាទិត្យសប្តាហ៍មុន នៅពេលដែលរូបគេ និងមិត្តភក្តិចុះលេងទឹកសមុទ្រក្នុងសង្កាត់ Vaucluse ចម្ងាយប្រហែល ៩គីឡូម៉ែត្រពីទីប្រជុំជនក្រុងស៊ីដនី។ Nico ត្រូវបានមិត្តភ័ក្តិជួយសង្រ្គោះ​ និងបញ្ជូនមកមន្ទីរពេទ្យដោយមានរបួសជើងទាំងពីរ។

ឆ្នេររាប់សិបកន្លែង រួមទាំងនៅទីក្រុងស៉ីដនី ត្រូវបានបិទក្នុងសប្តាហ៍នេះ បន្ទាប់ពីមានការវាយប្រហារដោយត្រីឆ្លាម ៤លេីកត្រឹមតែរយៈពេល ២ថ្ងៃ ហេីយករណីស្លាប់ខាងលេីគឺជាលើក ទី ៣សម្រាប់ទីក្រុងស៉ីដនីនាពេលថ្មីៗនេះ។ អ្នកវិទ្យាសាស្ត្រអូស្ត្រាលីជឿថា ការកេីនឡេីងនូវកម្រិតទឹក និងកម្តៅក្នុងសមុទ្រ នាំឱ្យត្រីឆ្លាមហែលឡេីងមកលេី ដែលអាចរួមចំណែកដល់ការកើនឡើងនៃការវាយប្រហារដោយត្រីឆ្លាម៕